Эртыше рушарнян Юмылан ӱшаныше-влак Крешене пайремым палемденыт

Районысо православный храмлште – Калтаса ден Краснохолмский селалаште, Кӧтерем ден ™лыл Качмаш яллаште – 18 гыч 19 январь йӱдым Крешенелан лӱмдалтше кумалмаш-влак эртеныт, черке ден лӱмын ыштыме иорданьлаште вӱдым освятитленыт.

Тиде кечын Калтаса селасе черкыште калык шуко лийын, 19 январьыште кас марте калык тышке вӱдлан толын, а тыланыше-влак вӱдеш пуреныт. Кузе приходын старостыжо Олег Меньшиков палемден, тений вӱдеш пурышо-влак шукырак лийыныт. Игечыжат леве лийын, сандене, очыни. Уремыште улыжат –1 гына лийын да эше тений черке территорийыште вӱдеш пурымо верым пеш сай ыштен шынденыт – вургемым кудаш-чияш кабинке-влакым, вӱдеш пурашлан тошкалтышым. Икманаш, вӱдеш пураш чыла йӧн лийын. Ялсовет администраций тыршымылан кӧра чыла тиде ышталтын.

– Мемнан деке черке прихожан-влак купельым ышташ йодын толыныт, – ойла Калтаса ялсовет вуйлатыше Руслан Кутлубаев. – Тыгай поро пашалан оксамат муна: подрядчик «Лес» ООО лие. Тудын пашаеҥже-влак пашам тыршен ыштеныт, кок-кум кечыште шке пашаштым шуктеныт. Мый шкежат ончыч Крешене годым вӱдеш пуренам. Сандене кызытсе да ончычсо жапым таҥастарен кертам. Ынде ятырлан сайрак лийын.

Крешене годым вӱдеш пурымо жапыште лӱдыкшыдымылык мерым шуктен толмо нерген ялсовет администраций деч посна моло службо-влакат ойленыт. Черке воктене полиций, МЧС да районысо рӱдӧ эмлымверын пашаеҥже-влак дежуритленыт. Но чыла сай, нимогай проишествий деч посна эртен. МЧС-ын данныйже почеш, Крешене годым Калтаса районысо иорданьлаште 1349 еҥ пурен, республике мучко – 51 000 еҥ.

Вес семын лийынат ок керт. Ойлат, Крешене кечын вӱд поснак ойыртемалтше, юзо виян лиеш. Сандене, очыни, вӱдеш пураш шонышо-влак кажне ийын шукем толыт.

Храмын у настоятельже Сергий ачат Крешене вӱдын эмлыме вийже нерген каласкален да калыкым вӱдеш пураш ӱжын.