Российын президентше шке посланийыштыже ешлан полышым ончыктымо икмыняр уым пуртымашым каласен

Российын президентше шке посланийыштыже ешлан полышым ончыктымо икмыняр уым пуртымашым каласен.

Шуко специалист, социолог, аналитик-влак демографийын начар улмыжым калыкын ӱлыш пашадарым налме дене кылдат. Эше ик амал – 90 ийлаште демографический яме. Чын, илыш приоритет-влакым тачысе кечылан чот вашталтыныт. Ындыжым ӱдырамаш-влак тӱҥалтыште карьерым ыштат, эрласе кечылан ӱшаным да стабильностьым ыштат, вара веле еш да икшыве-влак нерген шонат.

Мемнан районыштат аза-влак шагалрак шочаш тӱҥалыныт. Калтасасе ЗАГС пӧлкан данныйже почеш, мемнан районышто 2018 ийыште 230 икшыве шочын, эртыше 2019 ийыште – 199, тидын годым 358 да 371 еҥ колен. Тыгак мужыраҥме статистике ӱлышемын: эртыше ийын 59 мужырым регистрироватленыт, а 2018 ийыште 70 у еш шочын.

Российын президентше Владимир Путин шке посланийыштыже аза шочмылан да ӱлыш доходан еш-влаклан полышым ончыктымо шотышто уым пуртымаш нерген ойлен. Тидыже аза шочмашым кугемдаш, колымашым шагалемдаш полша але уке, жап ончыкта. Ты пуртымо у мера-влак почеш ме шукырак лийына мо? Кузе те шонеда, лудшо-влак?