Амчемучаш ял гыч Изиляевмыт еш «Новогодние семейные игры – 2020» фестивальын финалыштыже участвоватлен

Эртыше каныш кечылаште республикынан рӱдолажын «Динамо» стадионыштыжо «Зеленая Роща» ден «Красноусолький» санаторийлашке каяшлан путевкым налашлан муниципаль этапыште сеҥыше 69 еш участвоватлен. Лач тыгай пӧлекым налыныт «Новогодние семейные игры – 2020» фестивальын финалыштыже сеҥыше команде-влак. Калтаса районышто фестивальын финалыштыже Амчемучаш ял гыч Изиляевмыт еш участвоватлен.

Лудшына-влак шарнат, очыни, кузе Изиляевмыт Альфред, Олеся да нунын Антон эргышт январь тӱҥалтыште фестивальын муниципаль этапыштыже сеҥеныт. Тунам латик команде участвоватлен.

Теве нунылан вучымо да тургыжландарыше тат – таҥасымашын финалже толын шуын…

– Уке, мыланна да моло участник-влаклан финал пеш кугу таҥасымаш лийын огыл, – ойла Олеся Анатольевна. – Чылалан тиде пайрем лийын. Чыланат веселан да культурно каналтенна. Республикынан район ден олалаж гыч 69 команде толын ыле. Чыланат палыдыме улыт, но тыгай шижмаш лийын, пуйто ме икте-весынам шукертсек палена. Чыла вере пайрем да келшымаш шӱлыш озаланен.

Фестиваль муниципаль этап семынак эртен. Тугай эстафете-влакак: «Змейка», «Пингвины», «Гимнастика», «Навигатор», «Каракатица» лийыныт. Тольык калык гына шукырак лийын. Фестивальыште сеҥыше-влакым награждатлымаште «Икоян Россий» партийын региональ исполкомжын вуйлатышыже Рустем Ахмадинуров, «Здоровое поколение – сильный регион» региональ партий проектын координаторжо Андрей Иванюта, БР правительствын вице-премьерже Фанур Ягафаров, БР-се образований да наука министр Айбулат Хажин, БР-се спорт да самырык-влак политике шотышто министр Руслан Хабибов, кумдан палыме хоккеист Андрей Зюзин, паралимпийская чемпионка Рима Баталова да молат лийыныт.

Эстафетыште мо эн кӱлешан – писылык але чулымлык? Уке. Изиляев Альфредын ватыжын мутшо почеш, эн тӱҥжӧ – команде, чак улмаш. А Уфаште эртыше весела старт чыла командым чак ыштен. Тидыже моткоч куандара. Сеҥыше-влак лийыныт, но модын колтышо-влак лийын огытыл. Фестивальын чыла участникше, нунын коклаште Изиляевмытат, муницпаль этапыште сеҥыше команде семын Дипломым да «Россия – моя история» интерактивный музейыште, Национальный музейыште, тыгак Башкир кугыжаныш курчак театрыште лияш билетым налыныт. Антон тиде кечын ачаже да аваж дене пырля таҥасымаште гына участвоватлен огыл, тыгак пайрем деч вара тудо «Россия – моя история» интерактивный музейыште лийын.

– Музей моткоч келшыш, – каласкала рвезе. – Пырдыжлаште моткоч кугу экран-влак кечат да тушто историй гыч тӱрлӧ тат-влакым ончаш лиеш.

Садак Антонлан шарнымашешыже весела старт-влак кодыт. Вет тыште тудын дене пырля ачаж ден аваже таҥасеныт. Нунылан эре тыге пырля погынаш шагал годым логалеш. Кугыеҥ-влакын шке пашашт уло: ачаже вахтыш кая, аваже уроклан ямдылалтеш. Но тиддеч вара Антон веле огыл, моло йоча-шамычат ача-авашт дене таҥасен кертыт. БР-се спорт да самырык-влак политике шотышто министр Руслан Хабибов тыгай еш модмаш-влак кажне ийын эртаралташ тӱҥалыт манын каласыш. Тиддеч посна шошым да шыжым тыгай модмаш-влак эрташ тӱҥалыт. «Икоян Россий» партийын региональ исполкомжын вуйлатышыже Рустем Ахмадинуровкаласыш: «2024 ийыште таҥасымаште тыгак Хабировмыт ешат участвоватлаш тӱҥалеш». Ныл ий гыч ме газетыштына тыгерак серена: «Калтаса район гыч ешлан Хабировмыт еш дене таҥасаш пиал логалын».