Эрла, 25 январьыште, чыла Тачана ден студент-влак шке пайремыштым палемдат

Тидын годым мемнан героинянат – Ахмадиева Татьяна Васильевна. Уке, тудо январь тылзын шочын огыл да Ларина лӱмешат лӱмдымӧ огыл. Тудын коважлан ты лӱм келшен.

– Изием годым мый тыгай пайрем улмо нерген, паленат омыл, – шыргыжалын вашлие мемнам Татьяна. – Икымше гана мыйым кевытыште шкенан ял гычак ик кочай саламлыш, эше мыланем ирис кампеткым налын. Мый тунам эше изи ӱдыр лийынам. Тыге мыйын пайремем улмо нерген пален налынам.

Татьяна Васильевна Илиш районысо Анач ялыште шочын-кушкын. А мемнан район дене тудым йӧратымаш кылден. Студент улмыж годым шке пелашыжым вашлийын, тудат Бирск оласе кугыжаныш педагогика институтышто тунемын. Латкандаш ий лиеш, кузе Павасола ял да тудын калыкше мемнан героинялан лишыл да шочмо лийыныт. Тыште тудо икшыве-влаклан марий йылмым туныкта. Мут толмашеш, шукерте огыл 9 классыште тунемше Егорова Ксения шочмо йылме да литература дене республике олимпиадыште призер лийын, а тудыжо Уфа олаште эртен.

Да-а, мемнан Тачана пиалан улеш, моло лӱм-влак дене таҥастарымаште, тудын шке пайремже уло. Да эше пайремым чыланат палат.

– Тӱҥ шотышто лишыл родо-шочшо, йолташ, пашам пырля ыштыме йолташем-влак саламлат, – ойла Татьяна Васильевна. – Конешне, саламлымашым налаш моткоч кумылло.

Героиньынан мутшо почеш, кызыт тиде пайрем тудлан тыглай кече гаяк: кече пашаште эрта, икшыве-влак, озанлык. Ончыч студент улмо годым пайремым веселан вашлийын, вет ты жаплан сессийым сдатлыме лийын. А таче Татьяна Васильевна – йӧратыме вате, ныжыл ава да пеҥгыдын йодшан туныктышо. Туге гынат, тудын шинчаже, студент годсо жап гаяк чолган йӱла. Чынжым каласаш гын, Пушкинын Татьянажлан изишат келшен ок тол. Чолга, весела, виян, таратыше. А чылажат икшывыже-влаклан кӧра. Вате-марий Ахмадиевмытын кум икшывышт – Илюша эргышт да Юлиана ден Настенька ӱдырышт. Эргышт индешымше классыште тунемеш, вашке тудат студент лиеш. Тунам Татьяна Васильевна, ончычсо семынак, ты пайремым шижаш тӱҥалеш, очыни.

Мемнан героинянам да районысо чыла Тачанам пайремышт дене алал кумылын саламлена. Нунылан порылыкым, илышыште шукырак пиалан татым тыланена. Тек кажне кече ояррак лиеш, а шӱм-чон пиал дене темеш. Тыгак чыла студентым саламлена. Нунын занятийышт пайдалын, куштылгын эртышт, а туныктышо-влак сай йолташ лийышт.