Общественный советын у составше пашам тӱҥалын

15 январьыште Россий МВД-ын Калтаса районысо пӧлкажын Общественный советшын организационный погынымашыже эртен. Тыште пӧлка вуйлатыше, полицийын подполковникше Эрнест Ляпустин да подразделенийын вуйлатышыже-влак лийыныт.

Эрнест Владимирович кӱчыкын район полицийын кодшийсе пашаже нерген каласкален. Мучаште тудо совет член-влакым осал паша да правонарушений шотышто профилактикым эртарымыштлан кугу таум каласен.

Общественный советын составышкыже районышто палыме да пагалыме еҥ-влак пурат.

Тиде гана тудын у составышкыже индеш еҥ пурен: Виталий Акиев, «Калтаса ӱжара» газетын редакторжо; Роберт Шакиртов, район музейын директоржо; Владимир Ляпустин Россий МВД-ын Калтаса районысо пӧлкажын ветеранмыт ушем вуйлатышыже; Дамир Хузин, «Калтаса киновидеосеть» МУП-ын директоржо; Сергий ача, Калтаса черкын настоятельже; Багманов Фаниль – Хазрат, Калтаса районысо имам-мухтасиб; Роберт Иванов, районысо инвалид-влак ушемын вуйлатышыже; Сергей Марутин, РФ-ын сулло нефтяникше, «Башнефть» ООО-н ончычсо буровой мастерже; Екатерина Самойлова, Краснохолмский селасе «Шонанпыл» ДДТ-ын директоржо.

Общественный советын членже-влак совет вуйлатыше Виталий Акиевын пашажым кӱкшын акленыт да тудым адакат Общественный совет вуйлатышылан коденыт.

Тиде погынымаште идалыклан паша планым пеҥгыдемдыме да пашаче группа-влакым ыштыме.

Ю. Абдуллин