25 январь – Российысе студент-влакын кечышт

Шуко студент оксам ыштен налаш йӧным кычалеш. Пашам муаш тудлан нелырак: опытшо уке, адакшым тунеммаш дене паша жапым келыштарман. Но южо «оза» студентым пашаш налаш тореш огыл. Вет самырык-влак чолга, креативный да писе улыт. Адакшым опыт укелан кӧра студент пашадарым шуко йодын огеш керт. Кушко тугеже студентым уло кумылын пашаш налыт?

Ӱдыр-рвезе-влак шукыж годым промоутер пашам муыт. Уремыште рекламе да листовко-влакым шаркалат, тӱрлӧ дегустацийым эртарат. Промоутер-влак шкалан келшыше жапыште пашам ыштат.

Супермаркетыште мерчандайзерлан ышташ лиеш. Мерчандайзер сатум оптымылан, оборудованийым келыштарымылан, витрине-влакым сӧрастарымылан вуйын шога.

Курьерлан студент-влакым пашаш кумылын налыт.

Унагудышто, рестораныште портьелан, хостеллан, официантлан пашам ыштен кертыт. Хосетлан утларакшым мотор шӱрыгвылышан ӱдыр-влакым налыт.

Интернет-технологий аланыште, студент, мутлан, тӱрлӧ сайтым чаплыракым ыштен, фотогорафий-влаклан обработкым ыштен, текстым возен кертеш.