«Победа» ООО-н Качкинтурайысе ушкал фермыште икымше презе-влак шочыныт

«Победа» ООО-н Качкинтурай ялыште фермым эше чоҥат гына, тудым эркын-эркын пашашке колтат, тушто шукерте огыл кум презе шочын. Тидын нерген мыланна ферме вуйлатыше Рустам Ахмадиев увертарыш.

Презе-влак тыглай огытыл, а голштино-фризский тукым улыт. Икымше партий тӱж 368 вуй пашмакым Даний гыч кодший ноябрьыште конденыт ыле. Декабрьыште эше ик партийым конденыт. Кызыт тыште тыгай урлык 740 вуй уло. Нуно идалык мучко 10-12 тӱжем килограмм шӧрым пуат. А тыгай кугу фермыште чылаже 1200 вуй ушкалым ончаш лиеш. Ончыкыжым тиде тукым вольыкын эше ик партийым кондышаш улыт.

У вольык комплексыште ушкал шогымо кок верым пашашке колтымо, разводной площадкылаште оборудованийым ыштыме, инженер жизнеобеспечений системым колтымо. Санпропуск зданийым, доильно-молочный блокым, родильный пӧлкам чоҥымо, доильный оборудованийым пашашке колташ ямдылат.

Зернофураж ден комбикургым аралыме пӧлем-влакым вашке нӧлтен шуктат. А шудым, силосым да сенажым аралыме вер-влакым шыжымак ямдыленыт да нуным тушко аралаш пыштеныт. Кызыт вольыкым тушеч пукшат. Чыла объектым тӱҥалтыш гычак Ижевск ола гыч «Сельстрой» ООО чоҥа. Тиде предприятий вольык ончымо комплекс да яллан моло объект-влакым чоҥымо пашам шукта. Ижевскысе чоҥышо-влак Удмуртий, Татарийыште пашам ыштат, теве ынде мемнан республикыштат палыме улыт. «Сельстрой» ООО-н шке заводшо уло, тушто кӱлеш объектым чоҥашлан металлоконструкций-влакым ямдылат. Сандене предприятий чыла объектым вашке да сай качестве дене нӧлта.

Качкинтурайысе ферме – «Победа» ООО-н кугу инвестиций проектын кум объектше гыч иктыже. Агрофирме тыгаяк комплексым Бурай районышто чоҥа, Янаулышто шӧр заводшым кугемда – сырым ямдылыме цехым ышта. Инвестпроектын чумыр кугытшо – 2,3 миллиард теҥге.

Качкинтурай фермыште 100 у пашаверым ышташ шонат. Тиде эше чыла огыл. Тынар шуко вольыкым пукшаш «Победа» ООО-н Кугу Качакысе производственный участкыштыже пырчым ӱдымӧ площадьымат кугемдаш кӱлеш. Кугу площадьлаште пырчан культурым да кургым ончен куштыман. А тидыже воктен илыше ял калыклан пашавер да пашадар лийме нерген ойла. Тугеже пасулаште шӱкшудо кушкаш ок тӱҥал. Тиде фермыште лӱштымӧ ушкал-влак гына лийыт, а пашмак ден ӱшкыж-влакым агрофирмын Кугу Качакысе производственный участкын вес фермылаштыже ончен кушташ тӱҥалыт.

Калтаса районыш толын коштмыж годым республике вуйлатыше Радий Хабиров тиде комплексыште лийын. Тудо ферме объект-влакым – нӧлтен шындымым да чоҥалтше-влакым – ончен. Тыгак Даний гыч кондымо тӱж пашмак-влакым аклен да займ оксам налме нерген йодыштын. Агрофирмын генеральный директоржо Рамзиль Низаметдиновын мутшо почеш, кредитым нуно «Газпромбанкыште» налыныт. Тиддеч посна республика кредит семын 592,5 миллион теҥге залогым пуэн.