Краснохолмский селаште хоккей дене Башкортостан Республикын XXVIII-шо ялысе спорт модмаш эртен

Эртыше шуматкечын «Лидер» йоча спортшколын ий площадкыштыже республике йӱдвел районла гыч сборный команде-влак вашлиялтыныт. Музыка, Россий да Башкирий гимн, флагым нӧлтымаш да хоккей дене тале модмаш.

Хоккей – тале кучедалмаш. Тудын участникше-влак тыште шке мастарлыкыштым ончыктеныт: писын куржталмаш, шайбым вес команде деч налмаш, передачым ыштымаш, шайбым вороташке пуртымаш. Тидын дене болельщик-влакым куандареныт але мӧҥгешла, кунам шайбе вороташ логалын огыл, шӱлыкаҥыныт.

Модмаш деч вара Балтач район гыч хоккеист-влак сеҥышыш лектыныт, кокымшо – Бурай район гыч команде, кумшо – мемнан Калтаса районнан хоккей командыже. Сеҥыше ден призер-влакым Кубок, медаль да грамота-влак дене чапландареныт.

Тений мемнан район хоккей дене таҥасымаште участникш-влакым икымше гана вашлийын. Эше тидым палемдаш кӱлеш, таҥасымашым кӱкшӧ уровеньыште организоватленыт. Тыште «Лидер» ДЮСШ, «Нефтяник» ДК, район администраций, селан кугырак еҥже-влак тыршеныт. Нунын фамилийыштымат каласаш кӱлеш. Тиде Хузин Ильдар Гайданиевич, тудо мероприятийым эртараш полшен. Модмашын участникше-влак тудлан таум каласат.

Икте тургыжландара, болельщик-влак шагал лийыныт, кеч ты модмаш нерген районышто илыше калыклан ончылгочак увертарыме лийын. Шагал болельщик-влак коклаште район администраций вуйлатыше лийын. Юрий Минзарипович Садыров жапым муын да мемнан хоккеист-влак верч тургыжланаш толын. Чаманен каласаш логалеш, финалыш икымше да кокымшо верлам налше команде-влак гына каят. А мемнан хоккеист-влаклан тазалыкым, спортышто сеҥымашым тыланена.