Башкирийыште йоча-влаклан снюс ден кальяным ужалымылан – штраф

Башкирийыште ийготыш шудымо икшыве-шамычлан снюс, вейп, кальян, моло шупшмо смесь-влакым ужалымылан тыглай еҥ-влаклан штраф 3 гыч 4 тӱжем теҥге марте лиеш, вуйлатыше-влаклан – 30 гыч 40 тӱжем теҥге марте, предприятий-влаклан – 150 гыч 200 тӱжем теҥге марте.

Кодшо изарнян Кугыжаныш Погынын депутатше-влак пленар погынымаште законым луктыныт. Тушто ийготыш шудымо икшыве-влаклан чыла тидым ужалаш огеш лий манын возымо.

«Законопроектым ончымо годым шуко шонымаш, ӱчашымаш лийын. Тӱҥ шотышто тыглай еҥ-влаклан штраф ӱлыш улмым палемденыт, – каласыш Кугыжаныш Погынын вуйлатышыже Константин Толкачев. – Вич тӱжем теҥге штрафым федераль законодательстве палемден, ме тудым нигузе кугемден огына керт. Ийготыш шудымо икшыве-влаклан вейп ден снюсым ужалыме шотышто теме моткоч пӱсӧ лийын кодеш да тудым элна мучко каҥашат. Умбакыже, мыйын шонымаште, тидын шотышто федераль законым луктыт. Тиддеч ончыч ме шкенан территорийыште тидын шотыш кӱлеш мере-влакым приниматленна».

«Башинформ» ИА.