Калтаса ужара
+18 °С
Пылан
Все новости
Новости
5 Пургыж 2020, 13:21

Янаул олаште «Сеҥымаш салют» калык творчестве республике фестивальын зональный смотржо эртен

Фестивальым торжественный митинг дене почын. Тушто фестивальын участникше-влаклан «Сеҥымаш республике марафонын «Курымашлык тулжо» капсулжым пуэныт. Курымашлык тул деч ужашыжым Калтаса район деч район администраций вуйлатышын алмаштышыже Е.А. Алексеева налын.
Конкурс отборышто, а тудыжо кок кече шуйнен, республикын йӱдвел-касвел зоныжын шым район ден ола гыч творческий коллектив участвоватлен. Шуматкечын, мемнан Калтаса район деч посна, шке концерт программыштым Краснокам, Татышле район да фестивальын озаже – янаулмыт ончыктеныт.
Концерт программе оҥай лийшаш лийын, вет темыжат кугу да кугешнымашын йоҥген. Сандене калтасамыт тыршеныт. Икымше мут, икымше аккорд, икымше такт гыч мемнан артистна-влак залыште шинчыше калыкын шӱм-чонжым таратеныт. Программе стилистический да жанровый содержаниян лийын. Тыште, мутат уке, программын режиссержо О.Н. Мерзлякован надырже кугу. Кажне номерыште – кугу элнан патырлыкше да лӱддымылыкшӧ, калтасамытын шочмо элже верч кугешнымашыже, тудын историйже, культурыжо лийын. Артист-влак чыла тидым залыште шинчыше калыклан ончыкташ тыршен.
Калтаса гыч артист-влакын выступленийыштым кажне изи ужаш марте шонымо да ыштыме. Йӱк, тул, костюм-влак – чылажымат ямдылыме, а сценыште ту геройлык эпоха ылыжын. Декораций-влак шуко лийын огытыл, улыжат герой-калтасамытын фотосӱретышт дене баннерышт-влак. Нимогай юватылмаш, пауза деч посна икте-весыштым творческий коллектив ден солист-влак вашталтеныт. Калтаса музыкаль школын йоча хоржо, «Шонанпыл» йоча усталык пӧртын «Фантазия» хореографический ансамбльже, «Лидер» йоча творческий ушем, «Солнечные лучики» йоча вокал ансамбль, «Сударушка», «Ший оҥгыр» калык вокал ансамбль, «Зангари», «Йэншишмэ» фольклор коллектив, Калтасасе ветеранмыт хор, Ольга Алкаева, Светлана Мусина – кажныже Кугу Сеҥымаш темым почмаште шке шӱм-чонжым пыштен. Янаулмытлан Краснохолмский села гыч эрге-влак – «Холмичи» пане дене шоктышто образцовый театр келшен. А кунам «Барыня» мурышо калык ансамбль выступатлен, нунын мурышт деч залыште шинчыше кажне еҥын шинчаштыже шинчавӱдым ужаш лийын.
Артем Ярославов ден Роберт Шарафович Шакиртов – тиде программым вӱдышӧ-влак веле огыл, а творческий дуэт манын каласаш лиеш. Сценыш кажне гана лекмышт посна номер гай лийын.
Жюри могай иктешлымашым ышта, фестивальын гала-концертышкыже могай номер-влак пурат, огына пале. Но иктым каласен кертына, мемнан артистна-влаклан совым рӱжге кыреныт. Тиде сеҥымаш нерген ойла огыл мо.