Республикын йӱдвел зоныштыжо эн тале ечызе-влак таҥасеныт

Эртыше арнян Калтаса селаште ече дене таҥасымаште Башкортостан Республикын тунемшыже-влак коклаште XXII-шо спартакиадын зональный этапше эртен

Калтасасе йоча спортшколын ече трассыштыже зональный таҥасымаш-влак чӱчкыдын огыл эртаралтыт. Тений нунылан пиал шыргыжалын да Бурай, Татышле, Аскин, Мишкан да мемнан шочмо районнан школлаж гыч 50 утла участникым вашлийын.

Мемнан районнан чапшым 1 №-ан Калтаса кыдалаш школ арален, тудо вӱргечын, 29 январьыште, спартакиадын муниципаль этапыштыже сеҥен улмаш. Таҥасымаш личный, тыгак командный первенстве дене эртен. Тидым палемдаш кӱлеш, таҥасымашке чыла огыл район гыч толыныт. Тиде кечын Караидель район гыч команде толын огыл.

Йӱдвел зона – республикыште ече дене таҥасымаште ик эн виян улеш. Сандене кажныжын таҥасымаште сеҥаш шансше лийын. Да игечыжат тиде кечын спортсмен-влакланат йӧнан лийын.

– Таҥасашлан игече моткоч сай, – тренер-влакым вашлийшыжла, ойла ДЮСШ-ын директоржо Марсел Шамсетдинович Давлетшин. – Кум километрыш куржаш, шуко огыл. Ик круг гына, трассат неле огыл манаш лиеш. Чылажат уло: волымаш, кӱзымаш да тӧр вер. Тендан икшывыда-влак ямде улыт гын, дистанцийым эртат.

Ечызе-влаклан тиде кечын кум километран дистанцийым классический стиль дене эрташ кӱлын. Кажне командыште 2005-2007 ийлаште шочшо кум рвезе да кум ӱдыр лийын. Чыла участник сеҥаш тыршен. Шагат утла жапыште икте почеш весе стартоватлен. А финишыш кажныже вий деч посна куржын толын. Чыланат огыл дистанцийыш куштылгын куржын кертыныт.

Рвезе-влак коклаште эн сай результатым 1 №-ан Калтаса школын 8 классыште тунемше Колбин Леонид ончыктен.

– Трассына шкенан, тыште кажне ечегорно палыме, – ойла кандашымше классыште тунемше рвезе. – Сандене мыланна куржаш куштылго лийын.

Тиде медаль икымше огыл, калтасамытын ечызе-влак копилкышкышт шийым Елизавета Васина ешарен. А шӧртньӧ ден бронзым Мишкан район гыч ӱдыр-влак Яндубаева Светлана ден Семенова Кристина налыныт.

Эше тидым палемдаш кӱлеш, Мишкан гыч рвезе-влакат кокымшо да кумшо верым налыныт – Павлов Родислав да Тукбаев Денис. Ныл медаль (ик шӧртньӧ, ик ший да кок бронза), пеҥгыде команде да сай кумыл – ече дене таҥасымашын результатше. Башкортостан Республикын тунемшыже-влак коклаште XXII-шо спартакиадын зональный этапыштыже абсолютный чемпион лӱмым Мишкан район налын. Виян-влак сеҥеныт.

Мемнан районнан командыже шеҥгелан кодын огыл, кокымшо лийын. А кумшо верым Аскин район гыч ечызе-влак налыныт. Кокымшо да кумшо верым налше ечызе-влак таҥасымашын финал этапыштыже участвоватлаш тӱҥалыт. Тудыжо февральыште Кумертау олаште эрта. А тылеч ончыч чыла ечызылан «Россий ечыгорно» дистанцийым эрташ логалеш.