Россий Первенствын финалышкыже самырык спортсменке лектын

Эртыше арнян Мордовийын рӱдолаштыже – Саранскыште 2003-2004 ийлаште шочшо ӱдыр ден рвезе-влак коклаште биатлон дене федераль округын Приволжский первенствыже эртен.

Тыште 16-17 ияш лӱйкалыше ечызе-влак Россий первенствын финалышкыже да элнан тунемшыже-влакын X спартакиадышкыже логалаш таҥасеныт. Нунын коклаште Башкирийын сборный командыжын составыштыже Калтаса ДЮСШ-ын воспитанницаже Анастасия Айгильдинат лийын. Индивидуальный куржмаште тудо 7,5 км ныл огневой рубеж дене эртен. Кажне промахлан спортсменкын жапышкыже 45 секундым ешареныт. Сандене лӱйкалымаште Настялан поснак тыршаш кӱлын. Эше тидым палемдаш кӱлеш, тренер Евгений Ахметдиновын воспитанницыже таҥасымашым удан огыл тӱҥалын. Пытартыш рубежыш толын шумыж годым кокымшо верыште лийын, тольык писе мардеж нӧлталалтмылан кӧра, тыште ныл йоҥылышым ыштен. Сандене финишыш кудымшо куржын толын.

Кокымшо дисциплиныште - кок огневой рубеж дене 4,5 км спринтыште - Настя луымшо верым налын.

Кок таҥасымашын результатше почеш самырык спортсменке Российын первенствын финалыштыже, тудыжо Екатеринбург олаште эрта, да тыгак Красноярск олаште эртыше Россий тунемше-влакын X спартакиадыштыже таҥасаш тӱҥалеш.

Настя молодец! Сеҥымашым тылат тыланена!

А. Грущак.