Уфа олаште шулдыран кайык-влакын Всероссийский выставкышт эртен

Уфа олаште ВДНХ-Экспо базыште кӧгерчен-влакын выставкышт эртен. Ик павильонышто шӱдылен кайыкым вераҥдыме лийын. Пӱтынь Россий да лишыл йот элла гыч кӧгерченым ончен куштышо-влак кайыкым тӱнямбал выставкыш конденыт. Шкеныштым ончыкташ да моло-влакым ончалаш тӱжемат пеле наре коллекционер-влак толыныт.

Тыште кайык-влакым онченыт веле огыл, тыгак нуным налын кертыныт – выставкыште ярминга пашам ыштен. Кайык-влакым ончен куштышо-влак кузе ойлат, ты пашам курымешлан йӧратет. А кӧгерчен-влакым ончен куштышо еҥ-влак шке кайыкышт нерген шагат дене ойлен кертыт.

Мемнан район гыч ты выставкыш Калмаш ял гыч Иван Першин миен. Тушко «Милютинские» тукым кӧгерченже-влакым намиен. Кӧгерчен-влакым ончен куштышо еҥ-влакым ужын, кутырен, шке опытышт дене пайлалтыныт, шкаланже шуко уым пален налын. Кайык-влак чотым ешарен – «Дракон» тукым гыч кӧгерчен-влакым налын.

– Выставкыште шуко тӱрлӧ тукым лийын, тидын годым Башкортостаныште лукмым, – ойла Иван Вячеславович. ¬– Мутлан, Уфасе спартак – кӧгерчен-влакын ончен куштышо-влакын поснак кугешнымашыже. Тиде башкир селекционер-влакын тыршыме пашашт. Тудым лукташлан пел курым эртен, – умбакыже ойла тудо. – Кӧгерчен-влак тӱрлӧ улыт, чоҥештылмышт, тӱсышт, нерыштын формышт дене ойыртемалтыт – но тиде чыла чонлан келшымаш. Конешне, тиде моткоч кугу паша, ты сомыллан шагал огыл окса кӱлеш.

Иван Першин изинекак кӧгерчен-влакым йӧрата. Эше 8 ияш лиймыж годым тудо икымше кайык мужырым налын. А 12 ияш улмыж годым кӧгерчен-влакым ончен куштышо-влак дене пырля Москва олаш кайык-влак пазарыш кӧгерчен-влакым ужалаш да налаш миен.

Тудын сеҥымашыжлан ешыжат куана. Вет тыште кажныже шке надыржым пышта. Кӧ дыр пукша, кӧ дыр вӱдым йӱаш пышта, кӧ дыр нунын дене кутыра.

Кӱкшӧ показательлан, чолга улмылан да кӧгерчен-влакым ончен куштымашке шке надыржым пыштымылан Иван Першин лӱмын Диплом дене палемдалтын.

Сай кайык-влакым лукташ манын, нуным ончаш, пукшаш да вольерым эрыкташ веле огыл кӱлеш. Тыште сай тукым лийже манын, мужыр-влакым чын ойырен налман.

Кӧгерчен-влак кеч-кунамат шке пӧртышкышт, шке пыжашышкышт вашкат, тидыже мыйым моткоч ӧрыктара. Йӱр, лум гоч, кеч-могай игечынат нуно шке пӧртышкышт, шке игышт-влак деке толыт. Мут толмашеш, кӧгерчен-влакым ончен куштышо-влак шукертак шекланеныт, писылык шотышто эн сай показательым да мӧҥгышкӧ пӧртылмӧ кӱкшӧ процентым ава кӧгерчен-влак ончыктат.