«Калтаса ӱжара» газетлан сералтше-влак коклаште тӱҥ призым Павасола ял гыч Ибакаева Зинаида Михайловна модын налын

Мыняр ий почела «Калтаса ӱжара» газет подписке кампаний эртыме жапыште шке лудшыжо-влаклан пӧлек-влакым кучыкта. Очыни, чыланат палат, «Калтасинская заря» газетлан сералтше-влак коклаште тӱҥ призым – «Орион» торгайыме компаний деч 5000 тӱжем теҥгылан сертификатым Калтаса села гыч Гайнуллина Татьяна Геннадьевна модын налын.

Ме шке лудшына-влакым тудын дене кодшо номерыште палыме ыштышна. Тудын дене пырля тыгаяк сертификатым марий йылме дене лекше «Калтаса ӱжара» газетлан сералтше, Павасола ял гыч Ибакаева Зинаида Михайловна модын налын. Тудо педагогика пашан ветеранже улеш, туныктымо паша стажше 37 ий. Трудовой книжкаштыже ик возымаш гына: Павасола кыдалаш школын тӱҥалтыш класслаште туныктышо. Кызыт тудо сулен налме канышыште улеш. Но чыла еҥланат Зинаида Михайловна туныктышо да наставник лийын кодеш. Шкенжын чон шокшыжым йоча-влаклан пуэн. Тудын шӱм-чонжо гоч шӱдӧ дене тунемше эртен. Шукылан тудо икымше туныктышо гына огыл, а кокымшо ава лийын. Лач тыгай еҥлан мемнан розыгрышыштына пиал шыргыжалын.

– Тӱҥ призым модын налмем нерген газет гоч огыл пален нальым, – каласкала Зинаида Михайловна. – Кевытыште ужалыше каласыш. Тудын пелашыже розыгрышыште участвоватлен улмаш. Ончыч шым ӱшане, мыскарам ойла дыр, шонышым. Варажым, конешне, йывыртышым.

Тыгай розыгрышыште тудо икымше гана ок участвоватле, но тӱҥ призым икымше гана модын налын. Пиал кунам гынат садак шыргыжеш манын, тудо ӱшанен. «Калтаса ӱжара» деч тӱҥ призым модын налше Зинаида Михайловна ӱмыржӧ мучко шочмо йылме дене газетым налын шога.

– Мый марий улам, – кугешнен ойла тудо. – Сандене марий йылме дене лекше газетлан серыктем. Кузе район газет деч посна илаш вара? Верысе увер-влак деч посна нигузе ок лий. Газетлан ак кӱза гынат, мый садак серыкташ тӱҥалам. Почто яшлыкыште газет уке – тыгайжым ме пелашем дене коктын умыленат огына керт. Сертификатым модын налмемлан куаненам – тыгай сай пӧлек.

Редакцийлан тыгай розыгрышым эртарымыжлан кугу тау. Тек газетыште сай да оҥай теме, поро увер шукырак лийышт.

Зинаида Михайловнан пелашыже Григорий Александровичат педагогика пашан ветеранже улеш. Сулен налме канышыш лекмекыже школышто шочмо йылмым туныктен. Тиде ешыште шочмо йылмылан эре шӱман лийыныт да тудым араленыт. Теве Влада уныкаштат, тудо каныш кечылан коваж ден кочаж деке унала толын, кидышкыже «Калтаса ӱжара» газетым кучыш. Кеч тушто мом возымын пелыжымат ок умыло гынат, тӱҥалтыш содыки, уло. Кидышкыже газетым налын гын, марий йылме ончыкыжымат тиде ешыште илаш тӱҥалеш..