Йӧным мушо йӧрым кочкеш

Пӱй эрыктыме пастым кушто да молан гына огыт кучылт?!

Тудо паньым ошемдаш келшен толеш. Пастым панышке йыгыман да 5 минутлан кодыман, вара мушман. У гай лиеш! Мебель, вургем але ковер гыч кофе, чай але йошкар арака палым кораҥдаш манын, пастым йыгыман, 10 минутлан кодыман, вара ӱштман але мушман. Салма чот шемемын але рӱдаҥын гын, тушкат пастым йыгыман, изишак вучалтыман да мушман.

Ванныйыште кафель лавырген гын, пастым ӱмбакше йыгыман да 15 минут гыч пеҥгыде губко дене ӱштыл кораҥдыман.

1 литр вӱдыш изишак пастым ешараш да яндам, воштончышым йыгаш гын, нуно вӱдыжгымым чарнат.

Йолчием ош пундашан да лавырген? Тушко пастым йыгаш, изиш вучалташ да мушкын колташ гын, уэш ошын волгалташ тӱҥалеш;

Шыҥа, моло чоҥештылше пурлыныт гын, адакат тудым йыгалтымак полшен кертеш; пӱйым эрыктыме пасте корштымым веле огыл чара, тыгак пуалшым пытара, шӱяш тӱҥалмым чактара; мланде пашам ыштымеке, кӱч йымалне лавыра погына. Тудымат пасте полшымо дене куштылгын мушкын колташ лиеш; вургемыш але иктаж куэмыш помаде логалын гын, ты верыш пастым йыгыман, 10 минут вучалтыман да леве вӱд дене мушкын колтыман. Пале деч, манмыла, «пушат» огеш код!