Башкирийыште яллашке пашам ышташ толшо туныктышо-влак 1 млн теҥге дене налыт

Башкирийыште яллашке, паша поселкыш, ола типан поселкыш але 50 тӱжем теҥге марте калыкан олаш пашам ышташ толшо туныктышо-влаклан 1 млн теҥге дене компенсацийым тӱлаш тӱҥалыт.

Ик гана тӱлымӧ компенсаций нерген келшыше пунчалым регионын правовой информаций официаль интернет-порталыште вӱргечын савыктыме. Субсидий кум ий жапыште ойыралтеш – 2020 гыч 2022 ий марте. Ий еда, 1 декабрь марте тӱлат.

Кузе документыште палемдалтын, ик гана тӱлымӧ компенсацийым налаш претендент-влакым конкурс комиссий ойырен налеш.

Претендент-влак деке йодмаш – 50 ий марте ийгот, келшыше образований лийшаш, тыгак школышто туныктышо должностьлан пашам ышташ пурымо годым арнялан 18 шагат деч шагал огыл тунемме нагрузко лийшаш, тыгак 5 ий тыршыман.

Конкурсышто 50 км ӧрдыжтӧ пашам ыштыше але илыше туныктышо-влак участвоватлен огыт керт. Келшыше муниципалитетыш илаш кусныман.

Туныктышо-влак деч йодмаш ий еда налылтеш, 10 январь гыч 15 апрель марте.