Калтасаште «Учитель года-2020» конкурс районысо эн сай туныктышо-влакым палемден

Чын мастарлан профессий паша гына огыл, а шӱм-чон йодмашке савырна. Лач тыгай мастар-влакым ме «Учитель года – 2020» район конкурсышто ужын кертна.

«Хрустальный пеликанын» шулдыржо йымалне

Тений «Учитель года – 2020» район конкурсышто вич школ гыч туныктышо-влак участвоватленыт. Тиде – 2 №-ан Калтаса КШ-ын тӱҥалтыш класслаштыже туныктышо Надежда Сергеевна Аксаева, 3 №-ан Краснохолмский КШ-ын туныктышо-логопедше Гульнара Ахнафовна Нурисламова, Кӧтерем КШ-ын историй ден обществознанийыжым туныктышо Татьяна Викторовна Банникова, Кугу Качак КШ-ын Россий калыкын духовно-нравственный основыжын культурыжым туныктышо Виолетта Маратовна Набиева, Павасола КШ-ын башкир йылмым туныктышыжо Раушания Феоктистовна Коновалова.

Кажныжын шке паша опытшо, шке профессионал инструментше уло. Лач нуным туныктышо-влак конкурсышто почаш тыршеныт. «Учитель года – 2020» район конкурс марафонышто нуно заочный турым эртеныт, тыште нуно интернет-ресурсым презентоватленыт, оҥай виш урок ден методике семинар-влакым эртареныт, «Я – учитель» эссем возеныт. Кажне конкурс этапым жюри аклен, тудым тений 1 №-ан Калтаса кыдалаш школын директоржо Н.Р. Кутлубаева вуйлатен. Конкурсын финалышкыже туныктышо-влак балл запасым поген толыныт.

Теве конкурсын финалже. Районысо Культура пӧртышкӧ пашам пырля ыштыме йолташыштым поддержатлаш районысо вич школ гыч туныктышо-влак, конкурсышто участвоватлыше туныктышо-влакын родо-шочшыт, лишыл еҥышт толыныт.

Конкурс тӱҥалме деч ончыч чыла погынышым район администраций вуйлатыше Ю.М. Садыров саламлыш.

– Тачысе конкурс – профессионально кушмаште адакат ик ошкыл, – палемдыш тудо.

Тыгак конкурсышто участвоватлыше-влакын кумылыштым нӧлталашлан «Учитель года – 2019» конкурсышто сеҥыше Е.М. Ахметдинова шуко поро мутым ойлыш. Калтаса музыкальный школын йоча хоржо ден «Шонанпыл» ДДТ-ын «Фантазия» куштышо коллективше туныктышо-влаклан чапле номер-влакым пӧлекленыт.

Салам лийже,

мый – туныктышо!

Йӱлашкак пурышо икымше конкурс тиде – визитный карточко. Тыште конкурсант-влак дене лишкырак палыме лийыныт. Кажныжын выступленийже оҥай, шарнаш кодшо лийын. Туныктышо-влак шкем ончыкташ тӱрлӧ жанр ден формым кучылтыныт, кузе профессийышкышт толмышт нерген каласкаленыт. Шке ойлымашыштышт нуно видеороликым, йомак сюжетым, литератур герой-влакым кучылтыныт.

Мый денем пырля тунемза

Поснак мастер-класс-влак оҥай лийыныт: 15 минутышо кажне участнице паша методшо, образовательный технологий-влакым кучылтмыжо, аудиторий дене кутырен да творческий шӱлышым чоҥен моштымыжо нерген каласкален. В.М. Набиева чыламат фольклор тӱняшке ӱжын: ончаш толшо калык калыкмутым кычалын, туштым туштен, калык модмаш дене модын. Т.В. Банникова «Звуки истории» урокышто тӱрлӧ элын образшым ужаш да историй эпохым шижаш таратен. Г.А. Нурисламова артикуляций гимнастике, логоритмике, парня гимнастике полшымо дене речевой дефект-влакым кораҥдаш лийме нерген каласкален. Н.С. Аксаеван тунемшыже-влак «Ступенька познаний» почеш йыр авырен шогышо тӱням тунемыт. Р.Ф. Коновалова дене пырля башкир калык вургемым шымленыт, кузе нуно башкирла каласалтыт, шарнен кодыныт.

Неле гыч лектын кертме ситуаций лиеш

Илыш южгунам тыгай ситуацийыш конда, шонет, пуйто, тушеч лекташ нимогай йӧн уке, да тушеч лекме нерген нимогай учебник ден методике литературышто возымо огыл. Тунемше-влак пытартыш урок гыч киношко каеныт гын, мом ышташ? Йоча: «Тендан предметда мыйын илышыште кӱлеш ок лий» манын каласа гын? Тыште чын корным туныктышын опытшо, тудын педагогика интуицийже, мастарлыкше каласат. Лач тыгай педагогика ситуаций-влакым конкурсантке-влак решатлышаш лийыныт.

Ик паша дене гына огыл

Конкурсышто пытартыш «Фейерверк увлечений» лийын. Тыште конкурсантке-влакын творческий номерышт волгыдо, оҥай, мондалтдыме, икте-весе деч ойыртемалтше лийын. Туныктышо-влак чыла ыштен моштымыштым ме тыште ужынна: мурымат йоҥгалтарат, сценкымат ончыктат, башкирлат кушталтат.

Туныктышо-влаклан чап минут

Чыла этапымат туныктышо-влак куштылгын эртен огытыл. Вет лач тыште таҥасымашын интригыже лийын. Кунам таҥасыше-влак виян улыт, кучедалашат оҥай. Жюри конкурсым иктешлымыж годым самырык артист-влак шке мастарлыкышт дене ончаш толшо калыкым куандареныт. Тиде – Артем Климовских, Виолетта Шайхетдинова, Дарья Шумкова, 1 №-ан Калтаса КШ-ын «Овация», ™лыл Качмаш КШ-ын «Вис-вис», «Шонанпыл» ДДТ-ын «Фантазия» куштышо коллектив-влак.

Конкурсын финалже. Номинант, сеҥыше-влакым увертарат. «За верность професии» номинацийыште Раушания Феоктистовна Коновалова сеҥен. «Вдохновение и педагогический артистизм» номинацийыште – Виолетта Маратовна Набиева. «За творческий подход к делу» номинацийыште – Надежда Сергеевна Аксаева. «За педагогические инновации» номинацийыште – Татьяна Викторовна Банникова. «Учитель года – 2020» район конкурсышто Гульнара Ахнафовна Нурисламова сеҥен.

Чыла конкурсантке дипломым, районысо образований пӧлка, образований пӧлкан профушемже деч приз ден пӧлекым налыныт, нуным пашам пырля ыштыме йолташышт, ялсовет администрацийын пашаеҥже-влак саламленыт.

Конкурс пытен, тудлан финал точкым шындыме. А туныктышо-влакын пашаштыт, кӧ тиде кӱлешан да вуйын шогышо профессийым ойырен налын, точка але шындалтын огыл. Кажныже классыш пурышыла: «Салам лийже! Урокым тӱҥалына» манын пелешта.