Краснохолмскийыште шӱкшакым погымо контейнер-влакым ешарен шогалтат

Редакцийыш Краснохолмский селасе Центральный уремыште илыше еҥ-влак деч контейнер площадке шотышто йодмаш пурен.

– Кузе нуно возат, тыште улыжат кум контейнер, тудо шӱкшак дене вашке темеш. Вет тиде микрорайонын чыла уремлаж гыч шӱкшакым кондат. Сандене урем несанкционированный свалкыш савырна.

Центральный уремыште илыше-влакын шонымышт почеш, чыла тиде поселкын тӱсжым амырта, калыкын кумылжым волта. А пӧрт-влак ты шучко да ӱпшалтше вер деч мӱндырнӧ огыл верланеныт.

Ты ситуаций шотышто Краснохолмский ялсовет администраций вуйлатыше С.В. Цедилкиным комментироватлаш йодна:

– Центральный уремыште илыше калыкын йодмашыжым ме шотыш налына. Сандене тений шошым ме ешартыш контейнер площадкым ыштенаш палемдена. Тыгак регоператор дене шӱкшакым жапыштыже шупшыктымо график шотышто кутырен келшаш кӱлеш.

Ты случай дене пайдаланен, мый тыште илыше калык деке обращатлалтам. Вет тыгай свалке-влакым ме шке ыштена. Тыге шкенан культурынам ончыктена. Шке сурторалте гыч шудым, укш, воштыр-влакым да тулеч молым луктын кудалтена. А вет нуным терыс вынемыш пышташ да ончыкыжым ӱяҥдыш семын кучылташ лиеш.

Села – тиде мемнан чумыр пӧртна. Тудын арулыкшо мемнан деч шога.