Калтаса села гыч Ширина Клавдия Никитична ты кечылаште 95 ияш юбилейжым палемден

Кугу Ачамланде сарын участникшын тулык ватыжым Калтаса ялсовет вуйлатыше Р.И. Кутлубаев, ветеранмыт райкаҥаш вуйлатыше О.И. Чикирева да Калтаса ялсоветын пашажым виктарыше О.В. Сайпушева саламлаш толыныт. Пӧлек дене пырля юбилярлан Россий президент В.В. Путин деч посна саламлымашым кучыктеныт.

Клавдия Никитична изинекак пашам ыштен. Тудо 1925 ий 15 февральыште Надеждин ялыште шочын. Тудын тукымын да аваштын вачӱмбакышт сар ийласе жап да неле паша логалын. Шоналтыза, кузе нуно пытартыш шурно парча марте лектышым погеныт, армийыш киндым колтеныт. Клавдия Никитична «Советская Армия» колхоз мландыште сар деч варасе тыныс жапыштат пашам ыштен. Ты колхозыштак фронт гыч толшо ончыкылык пелашыже – Ширин Гаврил Федорович тыршен. Тудын нерген, Кугу Ачамланде сарын участникше семын шуко возаш лиеш. Надеждин ялысе самырык рвезе Ширин Гаврил 1939 ий майыште армийыш служитлаш каен да 1946 ий май марте службым намиен. Лӱддымӧ минометчик, отделенийын командирже Кугу Ачамландын фронтлаштыже кредалын, Японий дене сарыште участвоватлен.

Клавдия Никитична ден Гаврил Федорович 1950 ийыште мужыраҥыныт, вич икшывым шочыктеныт. Фронтовик Гаврил Федорович 1978 ийыште колен, шкенжын кудло ийже марте илен шуктен огыл. Клавдия Никитична Кугу Ачамланде сарын тулык ватыже лийын кодын.

Кызыт тудо Калтаса селаште Мария ӱдыржӧ дене ила. Тудын 16 уныкаже да уныкашт-влакын 32 икшывышт уло. Шочшо-влак ковам йӧратат, пагалат, аралат. Ийготшо уло гынат, Клавдия Никитична чыла денат интересоватлалтеш. А кужу ӱмырын секретше нерген тудо тыге ойла: «Эре пашам ыштенам, нигӧм ондалкален омыл, полшаш тыршенам, еҥ-влак декат поро лийынам».