Ачамландым аралыме кече деч ончыч Калтаса район администраций вуйлатыше Кугу Отечественный сарын ветеранже-влак деке миен толыныт

Шушаш арнян Калтаса селаште «75 лет Победы в Великой Отечественной войне 1941-1945 гг.» юбилей медальым пайрем шӱлышыштӧ кучыкташ тӱҥалыт. Россий президент Владимир Путинын пунчалже почеш, чумыр сеҥымашке кугу надырым пыштыше ветеран-влакым чапландарат. Чаманен каласаш логалеш, тыгай кугу мероприятийыш чыланат огыл толын кертыт. Сандене район администраций вуйлатыше Юрий Садыров Кугу Отечественный сарын участникше-влаклан тиде наградым шке кучыкташ лийын. Тудын дене пырля ветеранмыт райкаҥаш вуйлатыше Евгений Иликбаевич Ильчигулов да еш службын вуйлатышыже Светлана Мавлявиевна Хамидуллина унаште лийыныт.

Калтаса районышто илыше калыкын сеҥымашке кугу надырым пыштымыштым аклаш ок лий. Эше самырык рвезе-влак фронтыш каеныт. Калтаса гыч Алексей Изергинович Ахматшинын фронтысо корныжо Ленинград воктене тӱҥалын. Тыште тудо шучко сарын могай улмыжым пален налын: йӱштӧ ден шужен илыме жапым, тале кредалмаш, лӱйкалымашым чытен лектын. Ленинград блокадым кӱрылмӧ деч вара ола ден села-влакым утарен, тушман группировко-влакым кырен шалатен, минометчик Алексей Изергиновичын служитлыме полкшо Эльбышкыла тарванен. Тыште тудо Сеҥымашым вашлийын. Тудо 8 ий служитлен, мӧҥгыжӧ 1950 ийыште пӧртылын. Сарын участникше II-шо степенян «Отечественный сар» орден, «За Победу над Германией», «Жуков» медаль, 1941-1945 ийласе фронтовикын значокшо дене палемдалтын.

Элнан икымше еҥже да район вуйлатыше деч тыгай тӱткышым ойырымаш поснак шерге. Сандене Токран ялыште веле огыл, тыгак районышто эн кугу ветераным Арсланов Ахматнур Хаматнуровичлан юбилей медаль тудын парадный кительыштыже посна верым налеш. Тений тудлан 100 ий темеш. 1940 ий 3 октябрьыште Йошкар Армийыш служитлаш каен. Мӱндыр Эрвелыште 52-шо корпусный артиллерийский полкышто 80 тылзе служитлен. Тушто сар тӱҥалме нерген пален налын. Ахматнур Арсланов артиллерист лийын. Тудлан эн кугу да шергакан награде – «За победу над Японией» медаль.

Делегаций Краснохолмский селаште илыше эше кок ветеран деке пурен. Тиде – Давлетшин Хазинур Валишеевич. Тудым фронтыш 1944 ийыште налыныт, Калинин оласе 95-ше запасной полкыш логалын. Мӧҥгеш 1951 ийыште гына пӧртылын. Хазинур Валишеевичым «За Победу над Германией», «30 лет Советской Армии» медаль-влак дене палемденыт.

Вес ветеран – Исекеев Алексей Семенович. Тудо Кугу Отечественный сарын участникше семын илышлан акым пала. Сарыш 1942 ийыште каен, Дальний Востокысо теҥыз авиацийыште служитлен, мӧҥгыжӧ кандаш ий эртымеке гына пӧртылын. Илыш опытым сай палыше ветеран ӱшана, поро паша кеч-кунамат аклалтеш. Алексей Семенович служитлыме жапыште гына 87 Тауштымашым налын. Тудым II-шо степенян Отечественный сар орден да лу утла медаль дене наградитленыт. Тыныс илышыштат Алексей Семеновичым ятыр награде дене палемденыт: Башкортостан Республикын сулло туныктышыжо, Россий просвещенийын отличникше, марий литератур классик Яныш Ялкайн лӱмеш премийын лауреатше, БАССР Верховный Советын грамотыж дене кок гана палемдалтын.

Теве тыгай улыт сар тергымашым эртыше мемнан ветеранна-влак. Кузе Юрий Минзарипович каласыш, тиде тукым мыланна пиалым, тыныс илышым пӧлеклен. Нуно чыла чытен лектыныт, сеҥеныт. Чаманаш веле кодеш, Кугу Отечественный сарын ветеранже-влак кажне ийын шагалем толыт. Туге гынат, ме, Шочмо элнан историйыштыже тиде героический страницым нигунамат огына мондо, курым мучко шарнен илаш тӱҥалына да нунылан кугу таум ойлена.