Все новости
Новости
28 Пургыж 2020, 17:15

Келтей ялын мастар озаватыже-влак пырля чумырген кид пашам ыштат

2019 ий шыже гыч ялысе клуб пашаеҥ-влак дене пырля библиотекыште ӱдырамаш-влаклан «Хозяюшка» клубым организоватлыме. Мастар ӱдырамаш-влак кажне арнян вӱргече еда погынат. Нуно уло кумылын тышке коштыт, тиде кечым лым лийде вучат. Мом гына огыт ыште мемнан кована-влак! Пидыт, ургат, тӱрлат. Шке мастарлыкышт дене икте-весыштым палдарат.
Занятийлаште ме тӱрлӧ мероприятийым эртарена. Тиде – «Поэтический минут» – сар нерген почеламутым лудына, мурым мурена, ялысе мыскара-влакым каласкалена.
Занятийлашке тыгак фельдшер Сайтаева Еленам ӱжына. Ик занятийыште Елена Александровна «Профилактика рака молочной железы» темылан мутланымашым эртарыш. Библиотекыште лудшо-влаклан тидын нерген памятке-влакым кодыш. Мутланымаш деч вара ӱдырамаш-влак тазалык нерген шке шинчымашышт дене палдарышт. Кажне эрдене гимнастикым, эмлыме массажым ыштымышт нерген каласкалышт, а кастене – скандинавский коштмаш.
Тиде гана Елена Александровна «Что такое коронавирус» теме дене мутланымашым эртарыш. Кызыт тиде теме моткоч пӱсӧ лийын кодеш. Телевиденийысе кажне каналыште тиде шучко чер нерген ойлат. Елена Александровна коронавирусын видше, тудын деч кузе аралалташ лийме, тыгак гигиене нерген ойлыш. Мероприятийыште тыгак йоча-шамычат лийыныт. Чыланат медшӱжарын каласкалымыжым тӱткын колыштыныт.
Елена Сайтаева Келтей ялыште шочын. Школ деч вара Бирскысе медицине училищыш тунемаш пурен, фельдшерын профессийжым налын да кызыт мемнан ял калыкым обслуживатла. Тудо ешан, Роман пелашыж дене кум икшывым ончен кугемдат. Ме тудлан пашаште сеҥымашым да еш пиалым тыланен кодына.
Тыгерак ме «Хозяюшка» клубышто занятий-влакым эртарена.
А кӧ мемнан мастар озаватына-влакын пашаштым налнеже, библиотекышке пагален ӱжына. Нунын шӧртньӧ кидышт тендан чыла тыланымашдам шуктат.
М. Ислаева