Светлана Галиахметова, Кугу Качак ялын шочшыжо, Татарстан Республикын кугыжаныш стипендийжым налаш тӱҥалеш

Февраль тӱҥалтыште Казаньысе (Приволжский) федераль университетыште тунеммаште да научный пашаште сеҥымашке шуымылан Татарстан Республикын специальный кугыжаныш степендийым пуымо шотышто церемоний эртен. Вуз ректор-влакын Ушемыштын шӱдымышт почеш, стипендийым сай тунеммылан, научно-практический конференцийлаште да предмет олимпиадылаште участвоватлымылан пуат.

Пайрем мероприятийыште Премьер-министрын алмаштышыже – Татарстан Республикысе образований да науко министр Рафис Бурганов, Татарстан Республикысе самырык-влакын пашашт шотышто министр Дамир Фаттахов, КФУ-н икымше проректоржо Рияз Минзарипов лийыныт.

Тыгай стипендийым Альметьевск оласе кугыжаныш нефтяной институтын 4-ше курсын студенткыже Светлана Галиахметоват налаш тӱҥалеш. Светлана – тунеммаште да наукышто сеҥымашке шуымо деч посна (Россий кӱкшытыштӧ эртыше конкурс ден конференцийлаште призер улеш, «Татнефть» ПАО-н самырык ученыжо удостоверенийже уло), спортсменке (АГНИ-н волейбол дене чумыр командын составыштыже улеш, ГТО комплексын шӧртньӧ отличий знакше уло), институтын илышыштыже чолган участвоватла.

Стипендийын кугытшо 27,8 тӱжем теҥге.

– Республике вуйлатыше-влак самырык еҥ-влакын научный пашаште участвоватлымышт годым полышым ончыктен шогат, тидыже мыйым куандара. Мемнан, студент-влакын, научный статьям возаш, нуным савыкташ, тӱрлӧ конференцийлаште участвоватлаш чыл йӧнат уо. Тидыже мыланем моткоч кӱлешан, ончыкыжымат наукым шымлаш йӧным ышта, – ойла Светлана.

Светлана Галиахметовам, Татарстан Республикын кугыжаныш стипендийжым налаш тӱҥалме дене саламлена.