Краснохолмский селаште 2 №-ан школым капитально олмыктымо деч вара пайрем шӱлышыштӧ почыныт

Эртыше ийын 2 №-ан Краснохолмский кыдалаш школ тудым ыштыме деч вара 50 ияш юбилейжым палемден. Селаште ты событий лӱмеш кугу пайрем эртен. Меат ӧрдыжтӧ кодын огынал, газетнан лаштыклаштыже чӱчкыдын школышто пашам ыштыше ветеран-туныктышо, выпускник, эртыше ийысе да кызыт пашам ыштыше туныктышо-влак нерген возымо материал-влакым савыктенна. Шкенан редакционный правил-влакым шотыш налде, ты школ нерген материал-влаклан лӱмын рубрикым ыштенна ыле. Тидыжым ышташак кӱлын.

2 №-ан Краснохолмский кыдалаш школ чапле корным эртен, нефтяникмыт поселкышто веле огыл, тыгак районышто волгыдо кышам коден. Тыште талантан, тӱрлӧ велым ушан-шотан туныктышо-влак пашам ыштеныт. Мутлан, чыланат шарнат ӱдырамаш-влакын «Гармония» мурышо ансамбльым. Тудым культурын сулло пашаеҥже Владимир Новоселов вуйлатен. Школын ӱдырамаш-туныктышыжо-влак шке мурышт дене районышто веле огыл, тыгак республике илыше калыкым куандареныт. Республике телевидений нуным ончыктен, лӱмын музыкаль передачылашке миеныт. Эше тидым ушештараш кӱлеш, кокымшо школышто тунемше-влак экскурсий дене пӱнынь элыште лийыныт, а тудым географийым туныктышо Римма Инсафовна Ибрагимова организоватлен. Школ мыняр талантан ӱдыр ден эрге-влакым луктын?! Мут толмашеш, мемнан редакторнат Виталий Аксяевич 2 №-ан Краснохолмский кыдалаш школын выпускникше улеш. Юбилей вашеш ты школ нерген шуко возенна ыле. Теве тидым ышташ эше ик амал уло. Тудым школын историйыштыже у этап тӱҥалме нерген манын каласаш лиеш.

Школым 1969 ийыште чоҥеныт. Пытартыш 20-30 ий, рашрак каласаш гын, тудын зданийже чыла йодмашлан келшен толын. Илен-толын чыла тоштемеш, тудым вашталташ кӱлеш. Сандене кокымшо школымат капитально олмыкташ кӱлын. Башкортостанын 100 ийым темымыж вашеш 2017 ийыште 2 №-ан Краснохолмский кыдалаш школым 100 юбилей объект коклаш пуртеныт да паша шолаш тӱҥалын. Ик ият пеле наре школын тунемшыже ден туныктышыжо-влак Киябак тичмаш огыл кыдалаш школышто тунемыныт. Тыште кок смене дене пашам ыштеныт, шыгыр лийын. А ындыжым тыште волгыдо, мотор школ. Тудо кугурак улеш. Тошто зданийым реконструироватленыт, эше кум у крылом чоҥеныт. Чыла реконструкцийын сметный акше 154,5 млн. теҥгеш шуэш, тидын годым чоҥымо-монтаж пашалан – 121,2 млн. теҥге, оборудованийлан – 23,1 млн. теҥге. Школышто 400 йоча тунем кертеш, кызыт 295 ӱдыр ден эрге шинчымашым пога. А тений сентябрь гыч тыште 300 утла икшыве тунемаш тӱҥалеш. Кузе школ директор Елена Фанавиевна Нурова палемден, шушаш тунемме ийлан икымше классыш кум класслан йодмашым налме.

Школым почмаште тунемше-влакын ача-авашт, селасе пашаче коллектив, эше совет жапыште ты школын выпускникше-влак толыныт. Тыгак Уфа ола гыч уна-влак лийыныт. БР образований министр А.В. Хажин да Башкортостан Республикын Кугыжаныш Погынын – Курултайын депутатше Б.Г. Юмадилов лийын. Тыгак ӱжмӧ уна-влак коклаште «Геострой» ООО-ын чоҥышо-представительже-влак лийыныт.

Школын тӱсшӧ вашталтын, а ындыжым тудын у фасадшым ончен, ончычсо тошто школым ужаш ок лий. Пайремыш толшо чыла калык у школын вашталтше тӱсшым куанен ончен. Тыште, школыш пурымаште пайрем тӱҥалын. Уна да погынышо ача-ава-влакым школ директор Е.Ф. Нурова вашлие да саламлыш.

Елена Фанавиевна школышто туныктышо коллективын да тунемше-влакын сеҥымашышт нерген ойлыш. Республике да район вуйлатыше-влаклан тыгай чапле школым ыштымыштлан таум каласыш.

– Ме у школ нерген шоненна да теве шонымашна шукталте, – каласыш Елена Фанавиевна.

Символ сынан йошкар лентым пӱчмеке пайремыш толшо уна-влакым актовый залыш ӱжыныт, а почетан унамыт да вуйлатыше-влак школ директор дене пырля класс кабинет ден пӧлем-влакым ончал лектыч. Фасадын тӱсшым ончалмеке, школ кӧргыштат тыгаяк мотор манын шонымо шуэш. Чын, шонымашна тӱрыс миен лекте. Коридорлаште кӱварыште кафель, волгыдо да кугу класс кабинет-влак. Сенсорный пӧлем – психологический разгрузко пӧлем. Тыгай пӧлем районысо ик школыштат уке манаш лиеш. Кайык-влак мурат, пычкемше ужар тул… Ни унамытым, ни мемнам, репортер-влакым, тушко ышт пурто. Лӱмын напольный покрытий, тушко чарайолын гына пураш лиеш. Виш омса гыч ты пӧлемым ончышна. Кугурак класслаште тунемше-влак баскетбол дене модыныт. Кокымшо школын шке спортзалже нигунамат лийын огыл. Ындыжым уло, кугу, мотор, проста да волгыдо. Ындыжым шкеныштын командышт – чемпион-влак лийыт.

Саламлымаш мут-влак актовый залыште умбакыже шуйнен. Район администраций вуйлатыш Ю.М. Садыров чоҥышо-влаклан ӱшанле, сай пашам шуктымыштлан таум каласен. Нуно жапыште, сай качестве дене пашам шуктеныт да районлан чапле школым пӧлекленыт. Республикын образований министрже А.В. Хажин сценыш пеледыш аршаш дене лекте.

– Ме, Елена Фанавиевна дене ик группышто пырля тунемна да мый палем, шукерте огыл тудын шочмо кечыже ыле, – умыландарыш Айбулат Вакилович букет дене лекмыжым. – Мый тудым шочмо кечыже дене саламлем да ончыкыжым илышыштыже да пашаштыже сеҥымашым тыланем. Тудо пеш сай организатор улеш. Эше институтышто тунемме годым мемнам иктыш ушышо, тӱҥалтышым пыштыше ыле.

Тиде кечын шуко саламлымаш да пӧлек лийын. Тунемше-влакын ача-авашт, пашаче коллектив-влак, школын выпускникше-влак пӧлек-влакым кучыктеныт. Тыгай пайремлашке пӧлек деч посна огыт тол. Тидын годым у школыш.