Эртыше паша арня тӱҥ событий ден оҥай мероприятий-влаклан поян лийын

Кузе ме палемденна ыле, эртыше арня тӱҥалтыште черетан – муниципаль район Советын 31-ше погынымашыже эртаралте. Повесткыште ик эн ончыч район администраций вуйлатыште муниципаль район администрацийын 2019 ийысе пашажым иктешлен.

Ты Советын погынымашыже ты гана ойыртемалтын, депутат-влак «вашлийме верым» вашталтеныт. Погынымашым район администрацийыште огыл, а Культура пӧртын конференц-залыштыже эртареныт. Сандене, повесткыште йодыш-влакым лончылымо годым депутат-влак икте-весыштын тупыштым ончен шинчен огытыл. Конференц-залыште пӱкен-влакым «йыргешке ӱстел» йыр шындыме. Чыла тидыже деловой да виш мутланымашлан полша. Ик мут дене каласаш гын, тыгай уым пуртымаш муниципаль район Советын депутатше-влаклан келшен да нуно ончыкыжымат тыштак погынымаш-влакым эртараш шонат.

Тыгак район администраций вуйлатыше Ю.М. Садыров шке пашаж нерген депутат-влак ончылно веле огыл отчетым ыштен. Тудо Эстетика идалыкым почмо годым, а тушко пашаче коллектив, ветеран-влак да молат ӱжылтын лийын, район администрацийын 2019 ийысе пашажын результатше нерген докладым лудын. Шке докладыштыже район администраций вуйлатыше Юрий Садыров промышленность, чоҥымо, экономике, культура да образований сферылаште сеҥымашлашке шумо нерген поснак раш каласкален.

Докладым каҥашымаште мланде да пого кыл шотышто министрын пашажым шуктен толшо Полянская Наталья Юрьевна участвоватлен. Тудо калтасамытым Эстетика идалыкым почмо да Кугу Ачамланде сарыште совет калыкын Сеҥымашыжлан 75 ий темме пайрем дене шокшын саламлен.

Ты торжественный мероприятийыштак Кугу Ачамланде сарын участникше-влакым «75 лет Победы в Великой Отечественной войне 1941-1945 г.г.» юбилей медаль дене палемденыт. Теве нуно, мемнан геройна-влак: Фархетдинов Мухаметдин Фархетдинович, Мустафин Гайнигилим Талипович, Зайдуллин Гарифулла Зайдуллович. Награде-влак мланде да пого кыл шотышто министрын пашажым шуктен толшо Полянская Наталья Юрьевна, район Советын председательже Азат Габдрахманов, муниципаль район администраций вуйлатыше Юрий Садыров кучыктеныт.

Сарын ветеранже-влак деч вара сценыш ялсовет-влакын инициативный группын вуйлатышышт-влак ӱжылтыныт. Нунын тыршымыштлан кӧра мемнан районысо ял-влак Поддержка местных инициатив республике программыште участвоватлат. А художественный самодеятельный коллектив-влак шкеныштым ик эн сай номерышт-влакым нунылан пӧлекленыт. Райрӱдӧ Культура пӧртын методистше Лилия Матвеева пайрем сценарийым сай ямдылен. Сандене мероприятият ик шӱлышыштӧ эртен. Патриотизм, пашам тыршен ыштыше, шке шочмо элыштым йӧратыше еҥ-влакым пагалымаш дене.

Эртыше арня эше мо дене ушеш кодын? Элкӧргӧ паша органын пашаеҥже-влакын художественный самодеятельностьын зона смотрышто правопорядкым аралыше-влакын сеҥымашышт. Мемнан полиций пашаеҥна-влак молодец улыт!

Паша арня мемнан кумдан палыме да йӧратыме артистна Виктор Ванюшкинын юбилей касше дене мучашлалте. Калык тудым йӧрата да акла, «калык артист» манын ойла. Сандене тудым саламлаш мемнан районнан чыла луклаж гыч толыныт. Пошкудо районла гычат уна-влак лийыныт.

Виктор Ванюшкин шкенжым талантан артист семын веле огыл ончыктен, тудо эше самодеятельный композитор, чапле вӱдышӧ улеш.

Саламлена тыйым, Виктор!.