Ыштен ончо

Южыш тамле пушым лукшо натуральный ароматизаторым шке пеш простан да вашке ышташ лиеш.

Тидлан вичкыж шӱман кеч-могай цитрус: апельсин, мандарин, лимон – келшен толеш, но икымше фруктын ӱпшыжӧ сайынрак лектеш.

Тамле пушым лукшо «арверыш» савырыме деч ончыч цитрусым леве пычкемыш пӧлемыште 5 кече кучыман. Вара фрукт шӱмыш коштымо гвоздике кичкым (йӧрварым) чӱчкыдын кередылман да кагаз пакетыште эше 5 кече кучыман. Тыге ыштыме деч вара южым тамлештарыше «шоҥшо» ямде. Тудо икмыняр тылзе свежа пушым луктын, озажым куандараш тӱҥалеш. Шкаф кӧргыш сакыме натуральный ароматизаторын ӱпшыжӧ вургемым локтылшо когаршым поктен лукташ полша. Гвоздике-апельсин пушан арверым торшер але лампычке йӱлыман электроприбор воктеке сакаш гын, ӱпшыжӧ эшеат виян лектеш.