Ӱпетым шер да шыргыжал!

Чӱчкыдын нойымым шижат, кырча-марчалан кӧра вашке пуштыланаш тӱҥалат, сырет гын, тумо пушеҥге гыч ыштыме шергем нал. Тыгай шерге дене ӱпым шермеке, ласкарак лият, нелылык-влак эркын дене чакнат.

Акаций шерге энергетический вампир-влак деч сай аралтышлан шотлалтеш. Тудым паша верыште кучыза, тунам еҥын нимогай осал шонымашыже огеш лӱдыктӧ. Нелылык гыч лекташ але чын корным ойырен налаш нӧлпӧ пушеҥге гыч ыштыме шерге полша.

Пессимист-влаклан туя але лӱмегож гыч ыштыме шергем налман, тудо кумылым нӧлта да чыла осалым шке ӱмбакыже пога. Тылеч посна поянлыкым шупшеш да еш кылым пеҥгыдемда.

Пызле гыч шерге кӧргӧ чон шижмашым пӱсемда, пиалым пӧртылта да шонымашыш шуаш полша.

Олма але грушо пушеҥге гыч шерге озажым эшеат сылнештара, еҥын кумылжым савыраш полша, шучко омым кораҥда. Тыгак кажне кечын вийым ешара. Тудым сумкаштыда эре коштыктыза, нелылык кораҥ каяш тӱҥалеш.

Но чыла пу шерге пайдам огеш кондо. Мутлан, куэ, шопке, тополь, вӱдуа гыч ыштыме шерге-влак вийым налыт.