Калтаса ужара
+17 °С
Пылан
Все новости
Новости
6 Ӱярня 2020, 23:15

Калтаса районысо самырык спортсмен-влакын илышышт шолеш

Арамлан огыл, очыни, нуно тренировкышто тынар жапым йомдареныт, тренер-влак нуным шылталеныт. Чылажат арам лийын огыл. Вет нуно пьедесталын кӱкшӧ верышкыже логалыныт. Кеч кумшо, кокымшо але икымше вер. Садак пьедесталыште лийыныт. Арамлан огыл шукыжо шортын, шинчавӱдым йоктарен, арамлан огыл пӱжалтын.
Таче вара нуно мом шижыт? Нойымашым? Корно деч нойымо, содыки, шижылтеш. Да куан… февральын кокымшо ужашыже самырык спортсмен-влаклан неле лийын. ДЮСШ-ан южик воспитанникше биатлон дене Республике Первенствыште участвоватлен, кӧ ече дене таҥасымаште, кӧ дыр тунемше-влак коклаште ече дене таҥасымаште Спартакиадын финал этапыштыже. Кажне спортсмен тидлан уло вийжым пуэн. Биатлон дене БР Первенствыште сай результат-влакым ончыктеныт. Тудыжо 19-21 февральыште республикынан рӱдолаштыже эртен. Тыште тренер Ахметдинов Евгенийын кок воспитанникше – Айгильдина Анастасия ден Шакиров Никита участвоватленыт. Спринтыште Настя икымше лийын, Никита – кокымшо. Тунемше-влакын ече дене таҥасымаш Спартакиадыштын финал этапыштыже, тудо 21-23 февральыште Кумертау олаште эртен, Колбин Леонид 3 км классике стиль дене куржмаште сеҥен. Калтаса районын командыже тыште кумшо верым сеҥен налын. Ныл кече гыч вес таҥасымаште, тудо Уфа олаште эртен, Леонид биатлон дене спринтыште кокымшо лийын.
Тиде кечылаште таҥасымаш гыч Калтаса ДЮСШ-ан изирак воспитанникше-влак пӧртылыныт. Тиде 2008-2009 ийыште шочшо ӱдыр ден рвезе-влак. Нуно «Йэншишмэ» газетын призшылан верч Башкортостан Республикын Первенствышкыже миеныт. Тыште тренер Сапаев Андрейын воспитанникше Мадьяров Тимур сеҥен. Тыгак Айгильдина Алена начар огыл куржын, классике стиль дене куржмаште тудо нылымше лийын. 2006-2007 ийлаште шочшо-влак коклаште Раянов Ермак кумшо верым сеҥен налын. Кокымшо кечын смешанный эстафетыште Калтаса ДЮСШ-ан воспитанникше-влак адакат начар огыл результат-влакым ончыктеныт. Изирак команде кокымшо верым сеҥен налын, кугырак – кумшо лийын.
Теле эртыш. Туге гынат районысо спортсмен-влак тренировкым огыт кудалте. Тиде арнян Красноярск олан трассыштыже Айгильдина Анастасиялан таҥасымаш-влак тӱҥалыт. Тудым Х-шо телымсе Спартакиадын финалышкыже ойырен налыныт. Пеш вашке, Калтаса марафон ече спортым йӧратыше-влакым иктыш чумыра. Икманаш, районысо спортсмен-влакын илышышт шолеш. Зарядке, тренировко, таҥасымаш, вет эше нунын коклаште тунеммаш нергенат мондыман огыл.