Калтасамыт телым веселан да тамлын ужатеныт

Шуматкечын, кунам райрӱдыштӧ Ӱярням вашлийыныт, игече шӱлыкан да йӱштӧ лийын, поран нӧлталалтын, пуйто теле пытартыш кечылаште шкеж нерген шижтараш тыршен. Туге гынат теле арамлан шыдешкен, вет каяшат тудлан жап толын шуын: калтасамытат тудым ужатыме весела да тамле Ӱярня пайремым палемденыт. Эрлашыжлан игече ояр да кечан лийын. Ӱярня кечым конден манын каласаш лиеш.

Весела модмаш, хоровод, сий дене тич темше ӱстел, муро-влак – чыла тидым пайремын организаторжо-влак райрӱдыштӧ илыше калыклан да унамытлан ямдыленыт. Ӱярня пайрем дене чылаштымат «Собор русских Республики Башкортостан» райпӧлкан вуйлатышыже И.Р. Кононова шокшын саламлен.

Кеч игече телымсе гай поранан да йӱштӧ лийын, но вет тӱҥжӧ – сай кумыл. А тудыжым культура пӧлкан пашаеҥже-влак пурташ тыршеныт, ояр, весела представленийым ямдыленыт.

Орадым ыштылше скоморох-влак пайремын унаже-влакым представленийым ончаш ӱжыныт. Весела да тӱрлӧ модмаш, куштымаш, хоровод, муро-влак – тыште кажне еҥлан чонлан келшыше занятий лийын. Тыланыше-влак ходуль дене коштын кертыныт. Йоча-влак канатым шупшыныт, Зимушка-зима дене скакалке дене модыныт, сӱретленыт. Тидын годым весела сем да муро-влак йоҥгеныт. «Барыня» ден «Сударушка» мурышо калык ансамбль-влак, «Солнечные лучики» йоча коллектив, «Багряница» йоча фольклор ансамль, «Овация» ансамбль ден «Лидер» творческий ушемын самырык куштышыжо-влак калыкым куандареныт. Весела конкурс ден таҥасымаш-влак чылалан келшен. А могай Ӱярня тамле да шокшо мелна деч посна! Тыште кажне еҥ шокшо чай дене тутло да пушкыдо мелнам тамлен ончен кертын.

Пушкыдо, тутло, шокшо, тамле деч тамле, тӱрлӧ рецепт-влак почеш кӱэштме мелна. А нуныштым райрӱдысӧ пашаче коллектив-влак ямдыленыт да конкурсышто участвоватленыт. Тиде «Солнышко», «Рябинушка», «Сказка» йочасад-влак, йоча социаль приют, райрӱдӧ эмлымвер, библиотека, 1 да 2 №-ан Калтаса кыдалаш школ-влак, Калтаса ялсовет, централизованный бухгалтерий, «Центр» клуб да Кӧтерем гыч унамыт – Ионанно-Предтеченский храмын прихожанже-влак участвоватленыт. Жюрилан эн сайжым да тамлыракшым ойырен налаш неле лийын. Сандене нуным тӱрлӧ номинаций-влак дене палемдаш лийыныт. А руш-влак Соборын чолгаеҥже-влак пайремын унаже-влаклан мелнам ямдыленыт.

Ӱярнян курчакшым ямдылыме конкурсым эртарыме лийын. Кажныже шке семынже тудым ыштыме, сӧрастарыме дене ойыртемалтын. Тыште олым, ленте, выньык, куэм, хирургий перчатке гыч ыштылме лийын. Конкурсышто Калтасасе эмлымвер, «Центр» клуб, «Солнышко» йочасад, 1 да 2 №-ан Калтаса КШ, искусство школ, райбиблиотеке участвоватленыт. Эн ояр, олым гыч ыштыме мотор олям курчак, жюрин шонымыж почеш, Калтаса селасе райэмлымверын хирургий пӧлкажын лийын. Тиде Зинаида Сатаеван авторский пашаже. Конкурсышто участвоватлыше-влакым приз да пӧлек дене кумылаҥденыт.

А мучаште калык гуляйымаш да Теле чучелыжым йӱлатеныт. Тудын дене чеверласаш жап шуын да чевер шошым вашлияш кӱлеш.