«Пашаште эн тӱҥжӧ – тиде йӧратымаш», - тыге ойла 2 №-ан Калтаса кыдалаш школын тӱҥалтыш класслам туныктышо Динара Геннадьевна Хазиева

Ты кечылаште Уфа оласе «Торатау» Конгресс-холлышто «Взлетай!» школ образованийын кокымшо форумжо эртен. Тыште Башкортостанын вуйлатышыже Радий Хабиров кугыжаныш награде-влакым кучыктен.

Сценыште «Башкортостан Республикын сулло туныктышыжо» Чап лӱмым пуаш 2 №-ан Калтаса кыдалаш школын тӱҥалтыш класслам туныктышо Динара Хазиевам ӱжыктеныт.

Динара Геннадьевна изи икшыве-влак дене кумыл шуын пашам ышта. Теве 35 ий тудо нуным возаш, лудаш, шотлаш туныкта. Вет тудо тӱҥалтыш класслам туныктышо улеш. Тудлан ача-ава-влак шке икшывыштым ӱшанен пуат. А йоча-влаклан Динара Геннадьевна ӱшанле йолташ, полшышо, ик мут дене каласаш гын, «кокымшо ава» улеш.

– Тиде мыйын призванием манын каласаш лиеш, – ойла вашлиймына годым Динара Геннадьевна. – Мый вет горный институтыш тунемаш пурынем ыле.

Но шонымо семын миен ыш лек, руш йылме да литература туныктышылан тунем лектым. Да тӱҥалтыш класслам туныктымашкат вучыдымын тольым. Вара ышт колто. Чын, пӱрымаш деч мӱндыркӧ от кае. Тиде мыйын призванием улмаш. Тидлан доказательство – Чап лӱм. Тудым чылаланат огыт пу. Профессиональ мастарлык да ятыр ий тыршен пашам ыштымылан кӱкшӧ лӱмым пуат. А пашаже тудын чынжымак поро. Тиде ӱдырамаш тӱҥалтыш класслаште веле огыл туныктышо улеш, тыгак руш йылме ден литературым туныкта, ятыр ий тӱҥалтыш класслам туныктышо-влакын районысо методушемыштым вуйлата, ОГЭ ден ЕГЭ образований системыш пуртымо деч вара нине экзамен-влакын организаторжо улеш. Тыгак сайлымаште комиссийын членже, сайлымаш комиссийын секретарьже улеш. Ик мут дене каласаш гын, ик верыште гына шинчен ок мошто. Тудлан кушташ, мураш, сценыште модаш, туныкташ, путешествоватлаш – тичмаш вий дене илаш кӱлеш. Туге гынат Динара Хазиевалан эн тӱҥ – икшыве-влак. Ныл ий тудо нунын дене пырля шинчымаш корно дене ошкылеш, туныкташ, полша.

Пашаште эн тӱҥжӧ – йӧратымаш да икшыве-влаклан ӱшанле улмаш, – ойла сулло туныктышо. – Икшыве-влак тыгай йӧратымашым шижыт. Ик гана гына ондалет гын, тудо тыланет ӱшанаш ок тӱҥал. Вет кажне туныктышо икшывын шӱм-чонышкыжо корным муын моштышаш. Тыгак туныктышо кызытсе илыш дене тӧр ошкылшаш улеш.

Тыге ойла туныктышо. А вет тудо шӱм-чон йодмыж почеш ты профессийым ойырен налын огыл. Ӱшанаш ок лий. Юмо деч туныктышо дек гына школым тунем лекше выпускник-влак толыт, шке секретыштым ойлат, каҥашым йодыт. А вет тудын деке выпускник-влак кызытат куржталыт… Тугеже тудо ты лӱмым сулен налын.

Ме Динара Геннадьевнам «Башкортостан Республикын сулло туныктышыжо» Чап лӱмым налме да шушаш 8 март пайрем дене алал кумылын саламлена. Тиде тудын илышыштыже моткоч кугу событий. Тудын пашажым тыге кӱкшын аклыме дене моткоч куаненна. Икшыве, выпускник-влак да нунын ача-авашт лӱм дене талантан, профессийжылан ӱшанле улмыжлан да икшыве-влакым йӧратымылан таум каласена.