Кӧтереммыт телым веселан да келшен ужатеныт

Ӱярня – калыкын ик эн йӧратыме пайремже, тудо телым ужата да шошым вашлиеш. Теве Кӧтерем селаште февраль тылзын пытартыш шуматкечыжын Ӱярня пайремым палемденыт. Тудо чылт кугу пайремыш савырнен. Таҥасымаш, конкурс, модмаш да могай Ӱярня пайрем тамле мелна деч посна. Кӧтерем селасе озавате-влак могай гына мелнам ямдылен огытыл: пушкыдо, тутло, эсогыл мелна гыч тортым ыштеныт.

Пайремын организаторжо-влакат чыла йӱлам шуктеныт: ты гана гуляйымашке звездный воин-влак толыныт. Культура пӧртын пашаеҥже-влак «Звездные воины на Масленицу» театрализованный представленийым ямдыленыт.

Пошкудо галактике гыч кӧтереммытым пайрем дене саламлаш толыныт. Пырля тӱрлӧ конкурслаште участвоватленыт. Заданий-влакым эртымеке чыланат приз ден пӧлек-влакым налыныт.

Пайрем мучаште пырля чумырген чучелом – телым ужатыме символым – йӱлатеныт.