Мишканыште «Йылме, йӱла, тӱвыра-марий калык поянлыкын негызше» регион-влак кокласе научно-практический конференций эрта

«Мишкан - финн-угор тӱнян тӱвыра рӱдерже» программа кышкарыште тений 27 мартыште Мишканыште «Йылме, йӱла, тӱвыра-марий калык поянлыкын негызше» («Язык, традиции, культура - основа богатства марийского народа») регион-влак кокласе научно-практический конференций эрта.

Конференцийым Башкортостан Республикысе Калык-влак келшымаш пӧрт Марий Элысе «Ош кече» материальный огыл культур поянлыкым аралыше да вияҥдыше фонд да Башкортостан Республикысе марий юмыйӱла рӱдӧ религиозный организаций дене пырля, Мишкан район администрацийын полшымыж дене эртара.

Конференцийын цельже ден задачыже - шочмо йылмым да культурым арален да вияҥден шогаш; шочмо йылмым да литературым арален да вияҥден толмаште улшо проблемылам решатлыме корным кычалаш; марий юмыйӱлам марий калык культурын ужашыже семын арален да вияҥден толаш; марий юмыйӱлам марий калык культурын ужашыже семын арален да вияҥден толмаште улшо проблемылам решатлыме корным кычалаш.

Конференцийыште участвоватлат: мер пашаеҥ ден активист-влак, власть органын представительже-влак, марий йылмым туныктышо-влак, образований отделын методистше-влак, марий карт да юмын еҥже-влак, ученый образовательный учрежденийласе научный рӱдер-влакын представительышт, культура, библиотека пашаеҥ-влак, творческий коллектив-влак, массовый информаций средстван представительже-влак, тыгак кумылан моло еҥ-влак.

Конференций жапыште ныл секций пашам ышташ тӱҥалеш: «Марий юмыйӱла»; «Марий йылме»; «Эрвел марий-влакын мер илышышт»; «Марий культура да йӱла».

Конференцийыште Россий Федерацийыште илыше марий-влак участвоватлен кертыт.

Конференцийыште участвоватлаш да тушто выступатлаш шонышо-влаклан докладын текстше дене лӱмнержым ончыктен, йодмашым тыгай адрес дене колтыман:[email protected]

Ойырен налме тема дене выступленийлан 5 минут жап ойыралтеш, выступлений почеш каҥашымашлан эше 5 минут пуалтеш. Конференцийын итогшо посна сборник дене савыктен луктылтеш. Йодмашым 15 март марте колтыман.

Конференций Мишкан рӱдӧ библиотекын актовый залыштыже 27 мартыште эрта. 10.00 шагатыште тӱҥалеш.