Россий МВД-ын Калтаса районысо пӧлкаже БР-се МВД пӧлка-влак коклаште эртыше зона фестивальыште Гран-прим сеҥен налын

Ик кече, 26 февральыште, полиций пашаеҥ-влак шке формыштым сцене костюмлан вашталтеныт:районысо Культура пӧртыштӧ Башкортостан Республикын элкӧргӧ паша подразделенийын да орган-влакын пашаеҥыштын да нунын ешыштын самодеятельный художественный творчествын XXI-ше фестивальын зона смотр-конкурсшо эртен. Тудо Кугу Отечественный сарыште Сеҥымашлан 75 ий теммылан лӱмдалтын лийын.

Жюри ден ончаш толшо калыклан шке концерт номерышытым Россий МВД-ын Аскин, Балтач, Бурай, Калтаса, Краснокам, Мишкан, Татышле полиций пӧлка-влак ончыктеныт. Иктым палемдыме шуэш, ий гыч ийыш полиций пашаеҥ-влакын мастарлыкышт кушкын толеш, программе-влакат оҥай да сылнырак лийыт. Кузе мурышто мурат, полицейскийын пашаже «лӱдыкшӧ да неле». Нуно общественный безопасностьым аралат, неле жапыште эн ончыч полышым ончыкташ толыт. Нине пашам шуктымаште нунын илышыштын шуко жапше эрта. Сандене мурен-кушташ нунылан жап уке манынат шоналтет, очыни. Туге гынат, полицейский-влак чылаланат жапым муыт. Профессионал семынак нуно муратат да куштатат.

Фестиваль чылалан келшен. Ончаш толшо калыкынат, артист-влакынат кумылышт нӧлтшӧ ыле.

Фестиваль эртыме жапыште РДК фойеште декоративно-прикладной да изобразительный искусство выставкым шарыме ыле. Тыште поделке, аппликаций, сӱрет, тӱрлӧ да оҥай композиций-влакым ужаш лийын. Жюри поснак ойыртемалтше экспонат-влакым палемден. Нунын коклашке капитан Иван Султанов да тудын Светлана пелашыжын пашаштат логалын.

Калтасасе полиций пашаеҥ-влак эн ончыч выступатленыт. Мемнан программе тӱрлӧ жанрым авалтен: муро, куштымаш, музыкальный инструмент дене шоктымаш, почеламутым каласкалымаш. Кажне номер ойыртемалтше лийын.

Концерт программым «И Ленин такой молодой» муро композиций почын. Калтаса полиций пашаеҥ ден йоча-влакын хорышт (хормейстер Ирина Сапиева) поснак ойыртемалтше лийыныт. Концерт программым пӧлка вуйлатыше Эрнест Ляпустин вӱден. Тудлан концерт программым вӱдымыжлан дипломым кучыктеныт.

Алла Канданова ден Анна Туктамышеван вуйлатыме куштышо коллектив профессионализм дене ойыртемалтын. Мемнан полицейский-влак пеш мастарын музыкальный инструмент-влак дене шоктеныт, нунын деч вара шӱм-чон верыштыже шинчен туркен огыл – кушташ ӱжын. Нуным БР-ын культурын сулло пашаеҥже Анатолий Митрошин вуйлатен.

Концерт программым шке куштымаш да мурымаш номер-влак дене полицийын майоржо Владимир Матвеевын ватыже ден икшывыже да полицийын лейтенантше Сергей Минабашевын ӱдыржӧ сӧрастареныт.

ГИБДД-ын административный законодательствым шуктен толмо шотышто инспектор Лиана Гараева сар нерген шке шонымо почеламутшым лудын. Сылне мурым пӧлкан канцелярий вуйлатышыже Олеся Ибаева ден милицийын отставкысе майоржо Фидавий Гибадуллин шергылтареныт.

Конкурсын лауреатше дипломым пӧръеҥ ден ӱдырамаш мурышо ансамбль-влак налыныт (вуйлатыше-влак Ирина Сапиева ден Лилия Матвеева).

Ольга Мерзлякова вуйлатыме почеш Россий МВД-ын Калтаса районысо пӧлкаже фестивальын черетан Гран-прижым сеҥен налын.

Россий МВД-ын Калтаса районысо пӧлкажын вуйлатышыж ден личный составше фестивальлан ямдылымаште да тудым эртарымаште кугу полышым ончыктымаштлан район администраций вуйлатыше Ю. М. Садыровлан, вуйлатышын алмаштышыже Е.А. Алексеевалан, культура пӧлка вуйлатыше-влак З.Т. Шамсутдинова ден А.С. Валеевлан, специалист-влак – О.Н. Мерзляковалан, Л.И. Матвеевалан, А.Г. Кандановалан, К.А. Русиевалан, А.А. Туктамышевалан, А.М. Митрошинлан, К.В. Карпенколан, А.Н. Головколан кугу таум каласа.

Тыгак Калтаса шӧр заводлан (В.М. Фрасенюк), Нефтекамск оласе «Ягуар» казак охранылан, пӧлкан ветеранмыт ушемлан (В.А. Ляпустин), Общественный совет пӧлкалан (В.А. Акиев, Р.Ш. Шакиртов, Д.М. Хузин) кугу тау.

Э. Салимова