Калтаса ужара
+18 °С
Пылан
Все новости
Новости
11 Ӱярня 2020, 21:34

Изи принцессе-влак балыш погыненыт

Тиде арнян Калтаса районысо 60 изи принцессылан балым организоватлыме лийын. Изи ӱдыр-влак авашт дене пырля Калтаса селасе Культура пӧртыштӧ погыненыт.
Тиде ойыртемалтше ӱдыр-влак – инвалид йоча-влак. Нуно мемнан районын чыла ял ден селаж гыч толыныт. Конешне, тыгай балыш нуно икымше гана логалыныт. Чыланат мотор тувыр, сылне прическо дене лийыныт. Икманаш, чылт принцессе-влак улыт. Эрге-влакым тышке пуртен огытыл. Тыште ӱдыр-влак гына озаланеныт.
Эрге-влаклан кодшо арнян «Турнир маленьких рыцарей» пайрем эртен. Принцессе-влакын балыштышт, рвезе-влакын турнирыштышт семынак тыгай площадке-влак пашам ыштеныт: «Добро пожаловать в мир фантазий», «Мультипликация», «Тренинги», «Прекрасный вальс», «Кукольный театр». Но тиддеч ончыч нуным район администраций вуйлатыше Ю.М. Садыров, ойыртемалтше ӱдыр Элеоноран аваже – Серафима Канданова, тудо шӱмеш логалше «Мамам особенных детей» почеламутым лудын, саламленыт.
Тиде кечын Культура пӧрт йоча ден ава-влаклан мастарлык да усталык пӧртыш савырнен. Принцессе-влак модыныт, пластилин гыч нерынченыт, курчак театрын выступленийжым да «Простоквашино» мультфильмым онченыт. Ава-влакат тыгодым яра шинчен огытыл. Нунылан районысо специалист-влак тыгай площадке-влакым организоватленыт: «Женское счастье», «Красота», «Подарок», «Шарфики», «Здоровое питание».
Поснак «Здоровое питание» площадке оҥай лийын. Тыште Краснохолмский эмлымверын терапевтше Билалова Лилия Фаиковна кузе чын кочкаш кӱлмӧ, тыгак коронавирус нерген каласкален. А йоча-влак шке талантыштым ончыктеныт, у шинчымашым налыныт. Кажне ӱдыр чонжылан келшыше занятийым ойырен налын кертын. Ик балат куштымаш деч посна ок эрте. Районысо Культура пӧртын хореографше Алла Канданова дене пырля принцессе-влак вальсым репетироватленыт да нуным ончаш толшо калыклан пӧлекленыт.
Пайрем поро, весела да оҥай миен лектын. Районысо специалист-влакат, культура пашаҥ-влакат пайрем чыла шотыштат сай эртыже манын арам огыл тыршеныт. Но эн тӱҥжӧ, изи ӱдыр-влаклан мондаш лийдыме пайремым пӧлекленыт.