Краснохолмский села гыч шуко икшыван ава илышыште ава пиалым ик эн тӱҥлан шотла

Ӱдырамаш-влакын тӱнямбал пайремышт деч ончыч Башкортостанын вуйлатышыже Радий Хабиров республикысе шуко икшыван ава-влаклан «Ава чап» медаль-влакым кучыктен. Ты пайремыште 50 ӱдырымаш коклаште мемнан Калтаса район гычат шуко икшыван ава лийын.

Ольга Андреевна Лиховских Краснохолмский селаште ила. Тыште тудо шочын, кушкын, тыгак икшыве-влак шочыныт да кушкыт: Алена, Иван, Анастасия, Злата, Ярослав. А шукерте огыл, 16 февральыште, Ольга кудымшо гана ава лийын, нунын ешыштышт Владислав эргышт шочын.

Кугуракышт Алена медшӱжар профессийым ойырен налын, Пермьысе медицина колледжын студенткыже улеш. Иван ден Анастасия школышто тунемыт, Злата ден Ярослав йочасадыш коштыт.

Кугу ешыште ава лияш куштылго огыл. Кочкаш шолташ, мушкаш, гладитлаш – ты сомыллан мыняр жап да вий кӱлеш. А аза шочмо дене паша эше артыралтеш. Туге гынат Ольга Андреевна чылашкыжат етшаш тырша, икшыве-влак тудлан полшат. Икшыве-влакым туныктымаште икте-весым умылымаш, йӧратымаш, тидын годым пеҥгыдын йодмашат лийшаш.

– Икшыве-влак мыланем кугу пиал, – ойла шуко икшыван ава, – кажне икшыве вучымо да йӧратыме улеш.

Справке: вич да утларак икшывым ончен куштышо ӱдырамаш-влаклан республике награде пуалтеш. Медаль деке эше окса премий уло. Тачысе кечылан Калтаса район гыч шуко икшыван 162 ава наградым налын.