Калтаса селаште «Звонкий каблучок» калык куштымаш йоча коллективын Виш конкурс-фестивальын районысо этапше эртен

Тиде фестиваль-конкурсын тӱҥ задачыже – йоча ушемлаште калык куштымаш жанрым вияҥдымаш, мастарлыкым кӱкшемдымаш, усталык дене палдарымаш. Эртыше арнян райрӱдыштӧ тудын районысо этапше эртен, тудын участникше-влак шке талантыштым да моштымашыштым ончыктеныт.

Творческий таҥасымаште районысо образований учреждений-влак гыч йоча хореографический коллектив-влак участововатленыт. Нуно жюрилан калык куштымаш-влакым ончыктеныт. Куштымаш искусство конкурсым районысо школ деч ӧрдыжтӧ туныктымо рӱдер организоватлен.

– Кок ий конкурс райрӱдӧ Культура пӧртын сценыштыже кушташ йӧратыше-влакым чумыра, – ойла рӱдерын методистше Лилия Борисовна Габдуллина. – Тений районысо чыла образований учреждений конкурсышто участвоватлаш йодмашым пуэн. Чаманен каласаш логалеш, чыланат огыл участвоватлен кертыныт.

Конкурсыш икмыняр номерым лукшо участник-влак икмыняр гана сценыш лектыныт. Тиде Амчемучаш КШ гыч «Ош пеледыш» йоча куштымаш коллективше, Павасола КШ гыч «21 век», Кугу Качак КШ гыч «Чингылиос», 2 №-ан Калтаса КШ гыч «Вдохновение» да «Маград», 1 №-ан Калтаса КШ гыч «Овация», Ӱлыл Качмаш КШ гыч «Вис-вис», Келтей КШ гыч «Маленькие звездочки», 3 №-ан Краснохолмский КШ гыч «Карамель», 1 №-ан Краснохолмский КШ гыч «Акварелька» ден «Баракуда», Киябак да Марий Мераҥ тичмаш огыл кыдалаш школла гыч лийыныт. Чылаже конкурс-фестивальыште 120 утла йоча участвоватлен. Творческий арсеналым кучылтмо шотышто нимогай чарак лийын огыл. Улыжат композицийын программыштыже башкир материалым пуртыман лийын.

Жюрин составышкыже образований да культура сферын пашаеҥже-влак пуреныт. Нуно постановкым, куштымашым, музыкаль материалым акленыт.

– Кажне коллектив шке номержым сайрак ышташ тыршен, – ойла Лилия Габдуллина. - Икмыняр школ гыч кок ансамбль дене лийын. Тиде 2 №-ан Калтаса КШ деч. Мемнан школлаште куштымашым йӧраташ, шке калыкыштын культурыштым да йӱлаштым пагалаш да аралаш туныктат.

Куштымаш гоч чыла ончыкташ лиеш. Тиде кечын РДК-ын сценыштыже икшыве-влак движений гоч удмурт, башкир, марий, курыкмарий, эсогыл индий калыкын илышыж да культурыж нерген ойленыт. Тиде конкурс икшыве-влакын шке талантыштым ончыкташ йӧным пуэн да эн сай деч сайже сценыште выступатлен.

Конкурсым иктешлымеке кум ийгот тӱшка дене сеҥыше-влакым палемденыт, изирак (7-12 ий), смешанный да кугурак (13-17 ий).

Коллектив-влак коклаште 1 №-ан Калтаса КШ гыч «Овация» (вуйлатыше А.Г. Канданова) да Ӱлыл Качмаш КШ гыч «Вис-вис» (вуйлатыше Ибакаева И.Г.) ансамбль-влак сеҥеныт. Келтей КШ гыч «Маленькие звездочки» (вуйлатыше Ижболдин М.В.) да Марий Мераҥ тичмаш огыл КШ (вуйлатыше Шамыкаева З.А.) коллектив-влак кокымшо верыш лектыныт. Кумшо верым Павасола КШ гыч «21 век» (вуйлатыше Гараева Д.В.) да 2 №-ан Калтаса КШ гыч «Маград» (вуйлатыше Думбадзе В.А.) ансамбль-влак налыныт. Сольный куштымашлан Ӱлыл Качмаш КШ гыч (вуйлатыше Ибакаева И.Г.) Манисова Дарьялан икымше верым пуэныт, кокымшо Марий Мераҥ тичмаш огыл КШ (вуйлатыше Шамыкаева З.А.) гыч Шамыкаева Анастасия лийын да кумшо – Кугу Качак КШ гыч (вуйлатыше Набиева В.М.) Гадыршина Мария да 1 №-ан Краснохолмский КШ гыч (вуйлатыше Минилбаева Т.М.) Минилбаева Анна. Кугу Качак КШ гыч «Чингылиос» (вуйлатыше Зайнакаева Ю.С.) да Амчемучаш КШ гыч (вуйлатыше Шамыкаева А.К.) «Ош пеледыш» ансамбль-влак «За сохранение народных традиций» номинаций дене палемдалтыныт. Куштымаш ритмыште вӱршер кыра. Тыге каласаш лиеш мемнан сеҥышына-влак нерген. «Овация» ден «Вис-вис» ансамбль-влак «Звонкий каблучок» республике конкурсышто мемнан районнан чапшым аралаш тӱҥалыт.