Пеледышым ончышылан

Уло тыгай пале: кӧ суртышто каланхоэм кушта – пиалан лиеш. Сандене палаш кӱлеш, кузе ты кушкылым чын куштыман.

Каланхоэ кечан да изи ӱмылан верым йӧрата. Вӱдым шавыме годым, мландым сайынак нӧртыман. Шыжым да телым шуэн шавыман. Но шекланыза! Вӱд пеледыш кӧршӧк пундаште кодшаш огыл, уке гын, вожшо шӱэш. А изи температур годым, вӱдын кугу вӱдыжгылыкшылан кӧра, кушкылын лышташыже шӱйшӧ але амыше поҥго дене черлана.

Кушкыл тазалыкым пеҥгыдемдаш полша. Нерге але грипп профилактике годым кучылтыт. Кечеш 2-3 гана кажне неррожыш 3-5 чӱчалтыш каланхоэ сокым пыштыман.

Варикоз годым каланхоэ настойко дене йыгыман. Пеллитр шишам пӱчкедыме каланхоэ лышташ дене темыман. Тушко ош аракам але 70%-ан спиртым ешарыман. Арня гыч настойко ямде. Кастене йолвундаш гыч тӱҥалын, пулвуй марте йыгыман. Йол корштымым чарна. Тыге ныл тылзе ыштыман.