Калтаса ужара
+17 °С
Пылан
Все новости
Новости
15 Ӱярня 2020, 17:00

Ялысе спорсмен-влаклан полшеныт

Депутат Азат Габдрахманов, ялсовет администраций вуйлатыше Виталий Апсаликов, пайрем шӱлышыштӧ Актыганысе школлан спорт формым кучыктеныт, а спорткомитетын вуйлатышыже Вячеслав Кугубаев – волейбол топым.

Депутат Азат Габдрахманов, ялсовет администраций вуйлатыше Виталий Апсаликов, пайрем шӱлышыштӧ Актыганысе школлан спорт формым кучыктеныт, а спорткомитетын вуйлатышыже Вячеслав Кугубаев – волейбол топым. Топшат тыглай огыл, а чын – олимпийский.
Актыган школ мемнан районнан эрвел ужашыштыже верланен. Школын зданийжат тоштемын. Республикыште ындыжым тыгай тошто тунемме заведений-влакат уке улыт дыр. Тиде мыйын мутем-влак огыл, тыге муниципаль район Совет вуйлатыше Азат Габдрахманов каласен. А тудо кушто да кузежым пала. Тудо мемнан республикын чыла верлаштыже, тыгак Скандинавийыште, Европышто да араб тӱнян эллаштыже лийын.
Ты школышто физкультура урок яндар южышто эрта. Сандене моло спорт снаряд-влак дене куралаҥдыме спортзаллыште заниматлалтше ӱдыр ден эрге-влакын ямдылалтме кӱкшытышт сайрак манаш лиеш. Тидат мыйын мутем-влак огыл, а Россий спорт мастер Вячеслав Кугубаевын. Тудо спортсмен-влак нерген чыла пала манаш лиеш.
Вячеслав Имасевичын мутшо-влакым Актыган школышто тунемше спортсмен-влакын сеҥымашышт пеҥгыдемда. Тыгеракын, мини-футбол дене эрге-влакын командышт районысо первенствыште призер лийын. А волейбол дене ӱдыр-влак кокымшо верыш лектыныт, эрге-влак – нылымше. Курэш налык кучедалмаште 55 кг марте нелытан категорийыште Кандиев максим кумшо верыш лектын. Курчавов Максим (65 кг марте) – кумшо верыш. Физкультурым Ибакаев туныкта. Ӱдыр ден эрге-влак ече денат удан огыл куржталыт. Спорт дене тыгак кумылан улмыжым ужын, муниципаль район Советын депутатше Азат Галямутдинович Габдрахманов ден ялсовет вуйлатыше Виталий Ахтариевич Апсаликов спортсмен-влакым кумылаҥдаш лийыныт. Шке оксашт дене школын волейбол командыжлан спорт формым налыныт да нуным пайрем шӱлышыштӧ кучыктеныт.
А спорткомитетын вуйлатышыже Вячеслав Кугубаев волейбол топым пӧлеклен.
– Тиде тыглай топ огыл, а профессиональный, – каласен тудо. – Тыгай топ дене тӱнямбал олимпиадылаште гына модыт. Тендан кокла гыч иктаж-кӧ чемпион лиеш манын ӱшаныме шуэш.
Тунемше-влакат унамытлан шӱм гыч лекше таум каласеныт.