Кумыл нӧлтшӧ шошо

Шошо тӱҥалтыш кажным куандара: волгыдо, шокшо, пӱртӱс помыжалтеш. Пӱртӱс шкеж дене пырля кажнын чонжымат помыжалтара манам гын, йоҥылыш ом лий, шонем. Вет мланде веле огыл, меат ӱмбачна телын копажым налын кудалтымыла чучеш.

Агытан ялысе «Марий кумыл» фольклор ансамбльлан гын кок пачаш куанла чучеш. Вет нуно март тылзыште шкеныштын «шочмо кечыштым» пайремлат. Тений нунылан куд ий темеш. Шке семынышт пашаштым иктешлат.

Икманаш, 6 ий жапыште «Марий кумыл» фольклор ансамбль шке кумылжым веле огыл, республикынан 10 районысо марий калыкынат кумылжым нӧлтен: Шаран, Илыш, Благовещенск, Бирск, Балтач, Мишкан, Краснокам, Янаул, Калтаса, Дӧртыльӧ районлаште тӱрлӧ кӱкшытан фестиваль-конкурслаште вийжым терген, тӱрлӧ уым пален налын, а эн тӱҥжӧ – шкаланже вийым ешарен.

Кызытсе жапыште «Марий кумыл» ансамбль пелен «У тукым» фольклор ансамбль кушкеш. Ончет мотор марий ӱдыр-рвезе-влак ӱмбаке, колыштат мотор мурыштым, сем почеш тавалтымыштым, кумыл нӧлтеш. Вет рвезылык – тиде шошо. А шошо тек чыласнам куандара!

А «Марий кумыл» ден «У тукым» ансамбль-влаклан ешаралт шогыжо кӧргӧ вий-куатым, тазалыкым, кужу ўмырым, еш илышыштыда ласкалыкым, порылыкым, тичмаш киндерке гай пиалым тыланена.

Е. Егорова, Агытан ял.