Калмаш ялыште колым кучымо шотышто район конкурс эртен

Эртыше шуматкечын Калмаш ял пӱяште колым кучымо шотышто район конкурс эртен. Тудо Павел Михайлович Ипаевым шарныме лӱмеш эртаралтеш. Мероприятийыш тӱрлӧ ийготан колызо-влак – Калтаса ден Краснохолмский селала, Калмаш, Ӱлыл Качмаш, Торасола, Киябак да моло ялла гыч – погыненыт ыле.Ушештарем, икымше гана тыгай мероприятий 2004 ийыште эртен. Тудым лач Павел Михайлович Ипаев организоватлен, тунам тудо Сӧлеш ялсоветым вуйлатен. Вашке тиде мероприятийым район кӱкшытыштӧ эртараш тӱҥалыныт.Тений тышке колым кучаш йӧратыше 50 еҥ толын, нунын коклаште ӱдырамаш, йоча-влакат лийыныт.Игечат начар огыл ыле: эрдене изиш кылмыктен, южгунам кечат ончалын. Кукшо да пеҥгыде ий колым эҥераш кумылаҥден.Эн оҥай – колым кучымаш – тӱҥалын. Стартым пуымеке, колызо-влак чекем (лунка) шӱткалаш тӱҥалыныт, иктым гына огыл, икмынярым. Кажныже колым эн ончыч кучынеже лийын. Кол вигак чӱҥгаш тӱҥалын, сандене кӧ колым эн ончыч кучен, палаш йӧсӧ ыле, кажныже колым кучен лукмыж нерген кычкырен. Таҥасымашын судьяже-влак чыла тӱткын эскереныт, кажне кучымо колым шотленыт. Мый пӱя мучко ик участник деч весе деке коштынам, онченам. Колызо-влак икте-весышт дене эркын мутланен, тӱрлӧ оҥайым каласкаленыт, воштылыныт.Колым эҥыраш гына тӱҥалше (начинающий) колызо-влаклан профессионал-влак дене кучедалаш поснак неле лийын. Тыгайышт шагал лийыныт, конешне.Конкурс кок шагат шуйнен. Таҥасымаште Ӱлыл Качмаш ял гыч Игорь Сайфулин сеҥен. Кок шагат жапыште тудо 61 колым кучен. Палемдаш кӱлеш, Игорь тиде конкурсышто икымше гана веле огыл сеҥа. Кокымшо верым Торасола ял гыч Илья Ивангин налын. Тудын эҥырышкыже 52 кол пижын улмаш. Тыгак Илья «Эн изи кол» номинацийыште сеҥен. Тудын Дмитрий эргыже «Самырык колызо» номинацийыште сеҥен.Кумшо верыш, 44 кол дене, Краснохолмский села гыч Вадим Видецких лектын. Ныл ий ончыч В. Видецких район конкурсышто сеҥен лийын, тунам тудо 70 колым кучен.Илалше колызо Исакаев Николай лийын. Эн кугу колым Валтиев Владислав кучен. «Ӱдырамаш колызо» номинацийыште Зелина Шамсутдиновам палемдыме.Изиш каналтымеке, колызо-влак «Бурение лунок на скорость» конкурсышто таҥасеныт. Кажне участник кок лунко дене ыштен. Тыште Краснохолмский села гыч Андрей Бормотов ден Ӱлыл Качмаш ял гыч Андрей Сатыбаев чылам ончылтеныт.Сеҥыше ден призер-влак организатор ден Краснохолмский селасе спонсор «Левша» кевыт деч грамото ден пӧлек-влакым налыныт. Мероприятий чылалан келшен да сай кумылым пӧлеклен. Э. Мурсакаева.