Команмелна

Водын але 8-10 шагат ончыч мушмо шӱльӧ шӱрашым але «геркулесым» ӱмбалеш нӧртен шындыман. Тудо мелнан кумшо лончыжлан кӱлеш.

Ончыч руашым ямдылыман. Леве вӱдеш тамлен гына шӧнчалым шавалтыман, 3-4 муным чӱчыман, сайын лугыман да шокшо ош ложашым пыштен нӧштылман. Вара 30-40 минутлан шокшо верыш шындыман.

Ямдылыме руаш дене вичкыш (1,5 – 2 мм кӱжгытан) мелнам ыштыман, ӱян салмаш пыштен, духовкыш але шолгыман коҥгаш шындыман да чевергаш тӱҥалмешкыже кучыман. Тушеч лукмек, ӱмбакше торыкеш, кӱчымеш, кефиреш але шопо шӧреш манный шӱраш лугыман нугыдо лапашым шаралтыман да уэш коҥгаш шындыман. Чевергаш тӱҥалмекше лукман, ӱмбачше саде ончылгоч ӱмбалеш лугымо шӱльӧ шӱрашан лапашым шаралтыман да коҥгаште але духовкышто кӱын шумешкыже кучыман.

Команмелнам вичкыжым ышташ тыршыман. Кум лончын кӱжгытшӧ 6-7 мм гына лийшаш.

Перкан лийже!