Кугу Ачамланде сарын ветеранже Ахматнур Арсланов 100 ияш юбилейжым палемден

20 мартыште Токран ял гыч пагалыме еҥ, Кугу Ачамланде сарын участникше Ахматнур Хаматнурович Арсланов шӱдӧ ийым темыме юбилейже лӱмеш саламлымашым налын. Тудын лӱмеш пайремым райрӱдӧ Культура пӧртыштӧ организоватлыме лийын.

Пагалыме ветераным район администраций вуйлатыше Ю.М. Садыров, духовенстве ӱшанъеҥже-влак, меркалык, тунемше-влак 100 ияш юбилейже дене саламлаш толыныт. Тудым саламлышыжла район администраций вуйлатыше Юрий Минзарипович Садыров эртыше вашлиймашын кӱлешлыкше нерген палемден.

– Таче ме юбилейым гына огыл, а районлан моткоч кӱлешан исторический событийым палемдена, – каласен тудо, – районын историйыште тиде икымше событий – Кугу Ачамланде сарын участникшылан 100 ий теммын, ме пырля тудым саламлена.

Юрий Минзарипович юбилярлан Россий Президент Владимир Путин деч посна саламлымашым, район администраций деч пӧлек-влакым кучыктен. Шукерте огыл район вуйлатыше ветеран дене уналыкыште лийын: Ахматнур Хаматнуровичлан «75 лет Победы в Великой Отечественной войне» юбилей медальым кучыктен.

Ветераным тыгак духовенстве ӱшанъеҥже Назибя Абзаловна Хисматуллина, Краснохолмский села гыч «Ангам» мечетьын хазратше, Сӧлеш ялсоветын ончычсо вуйлатышыже В.М. Султанов саламленыт. Районысо краеведений музейын вуйлатышыже Р.Ш. Шакиров изирак исторический экскурсым ыштен, Ахматнур Хаматнуровичын боевой корныж нерген ойлен, тудо Японий дене кредалмаште участвоватлен. Вашлиймаште юбилярым, тудын лишыл родо-шочшыжо-влакым, унамытым Кристина Русиева ден Эрик Мурсакаев шке мурышт дене куандареныт.

Ахматнуров Хаматнуровичын илышыже воштончыш гай мемнан элнан историйже коеш: коллективизаций, сар, сар деч варасе тӧрланымаш.

Тудо тыглай кресаньык ешыште шочын да кушкын, тыште мландыште тыршыме пашалан акым пален. Эше изи улмыж годымак Калтаса районыш илаш кусненыт

Ахматнур Хаматнурович 1940 ий октябрьыште служитлаш каен. Мӱндыр Эрвелыште 52-шо корпусный артиллерийский полкышто служитлен. Кандаш тылзе гыч, кунам тудо военный формым чиен, шучко, шуко вӱрым йоктарыше сар тӱҥалын. Сар мийыме ийлаште Мӱндыр Эрвелыште чекым арален. Кугу Ачамланде сар пытен, а Ахматнур Хаматнуровичлан сар умбакыже шуйнен – ындыжым Японий дене. . Салтакым «За победу над Японией» медаль дене палемденыт. Ахматнур Хаматнурович 1946 ий августышто гына мӧҥгыжӧ пӧртылын. Тыште тудын тыныс паша илышыже тӱҥалын. Шке ялже гычак мотор Таслима ӱдырым марлан налын. Вич икшывым шочыктеныт да ончен куштеныт.

Кызыт Ахматнур Хаматнуровичын 9 уныкаже да уныкашт-влакын 11 икшывышт уло.

Ветеран ӱмыржӧ мучко мландыште тыршен: озанлыкыште тракторист лийын пашам ыштен, варажым вакшыште, пилорамыште тыршен, сварочный пашам шымлен. Тудо ик эн ончыч изи тракторым шке поген.

Кужу ӱмырын секретше нерген йодышлан ветеран тыге вашештен: «Нимогай секрет уке. Мый ӱмыр мучко поро шонымаш да поро паша дене иленам», – каласен тудо. – Пашам тыршен ыштенам, еҥ-влаклан полшенам, сандене илыш мыланем кужу ӱмырым да пиалан ий-влакым пӧлеклен». А воктене шинчыше родо-шочшыжо-влак тудын могай чолга улмыж нерген ойленыт, неле паша деч лӱдын шоген огыл манын каласеныт.

С. Аркадьева.