Школлаште дистанционно тунемаш тӱҥалыт

Башкирийын чыла школжо шошо каникул деч вара, а тудыжо 5 апрель марте шуйна, дистанционно тунемаш тӱҥалеш. Тидын нерген республикын образований министрже Айбулат Хажин увертарен. Кызыт тунемше-влак канаш тӱҥалыт, туныктышо-влак электрон оборудований дене пайдаланыме шотышто квалификацийым кӱкшемдыме курс-влакым эртат.

«Ача-ава да законный представитель-влак шке икшывыштым мӧҥгыштӧ коден огыт керт гын, школлаште 15 еҥ гыч шогышо лӱмын группа-влакым ыштыме лиеш», – каласен регионын образований министрже.

Айбулат Хажинын мутшо почеш, тунемше-влак программе почеш вараш огыт код, сандене кеҥеж жаплан тудым нигӧ шуяш ок тӱҥал.

Республикыште йочасад-влакым карантинлан петырыме ок лий. Туге гынат ача-ава-влаклан шыгыремден тӧрлатымашым пуртымо лиеш: ужатен толшо-влакым дошкольный образованийын зданийышкыже огыт пурто, йоча-влакым группыш пурымыж годым пуэн кодат. Тыгак кажне икшывын температурыжым туштак висат. Йочасадыште пӧлем чӱчкыдын дезинфицироватлалташ тӱҥалеш.

Тылеч посна министерствыште каласеныт, кеҥеж лагерь-влак пашам ышташ тӱҥалыт, йодмаш-влак налылтыт.

19 март гыч Башкирийыште образований министерствыште коронавирус инфекций шотышто ситуацийым умыландараш манын, шокшо линий пашам ышта. Тел.: 8 (347) 292-11-52. 9.00 гыч 18.00 шагат марте пашам ышта.