Васоламыт шошым марий йӱла почеш вашлийыныт

Шошо кушеч тӱҥалеш? Конешне,телым ужатымаш гыч. Калтаса районысо чыла ял ден селаште Ӱярня пайремым февраль мучаште да март тӱҥалтыште эртареныт. Васоламыт моло-влак деч изишак ойыртемалташ лийыныт. Молан? Нуно шукертак телым марий йӱла почеш ужаташ шоненыт. Вет Ӱярня пайрем марий-влакын кодшо арнян, шочмын, тӱҥалын. Калыкын весела да полмезе, йӧратыме мероприятийжым Васола ял клубын пашаеҥже Антонида Ибаева ден ялын старостыжо Радислав Зайнетдинов организоватленыт. Икымшыже пайремым кузе эртараш шонен гын, кокымшыжо тудлан чыла шотыштат полшен. Йоча-шамычлан пӧлек ден шере кочкышым налыныт, ял калык дене пырля погынен ӱстелым ыштеныт. Ӱстелым ыштымеке, чыла озавате тушко тӱрлӧ кочкышым нумалын. ӱстембалне шуко да тамле кочкыш ожнак ончыкыжым кочкыш шотышто чыла сай лиеш манмым ончыктен, кызытат тыгак. Ожно марий калык эрденак мончаш олтен, ару кап да сай шонымаш дене веле кумалаш тӱҥалаш лиеш улмаш. Эше мелнам кӱэштыныт, тудым ушкал ӱй ден йыгеныт. Мелна воктен шокшо шӧрым шынденыт да тушко изишак ушкал ӱйым пыштеныт. Тидым палемдаш кӱлеш, Ӱярнян мелна деч посна эше шуко шке йӱлаже лийын. Тачылан, чаманаш веле кодеш, шукыжо мондалтын. Но васоламыт чыла тидым уэш илышыш шыҥдараш шонен пыштеныт. Тыште, конешне шоҥгыеҥ-влакын каласкалмышт тӱҥ рольым модын. Мутлан, ветеранмыт вуйлатыше Тимиршин Тимирбай Тимиршинович Ӱярням ожно кузе вашлийыныт, каласкален. А пайремыш ӱжмӧ уна-влак тудлан каласкалаш полшеныт. Республикысе марий-влакын тӱҥ онаеҥышт Геннадий Пастиев, мелнам кочмо деч ончыч, кумалтыш мутым каласыш, вара гына мелнам ныл ужашлан пайлыш. Пайремыш тыгак Калтаса районысо «Эрвел марий» МНКА МОО-н вуйлатышыже Инна Ивановна Тимиряева, Краснокам районысо У Пураял гыч онаеҥ Виталий Ильич Искаков да Калмиямучаш ялсовет администраций пашаеҥ-влакым ӱжмӧ лийын. Саламмутым Инна Ивановна Тимиряева ойлыш да пайремын организаторжо-влаклан Чап грамото-влакым кучыктыш. – Ӱярня марий калыкын ик эн вучымо да йӧратыме пайремже, – палемдыш тудо. – Лач тудын деч вара чынжымак шокшо шошо толеш. Тудын дене пырля у шонымаш, ӱшан. Пӱртӱс ден пырля айдемат ылыжеш. Тиде изи ял калык телым йӱкын да веселан ужатен. Кугыеҥ ден йоча-влак тӱрлӧ конкурсышто уло кумылын участвоватленыт. Поснак Лиана Ванина, Султанаева Ирина, Иванова Диана, Гареев Евгений, Тимаев Сергей ойыртемалтыныт. Модмаш-влак деч вара пайрем участник-влак тутло мелнам кочкыныт да концерт номер-влакым онченыт. Ӱдыр-влакын «Ал пеледыш» ансамбльым да гармонист Кумужбаев Валерийым поснак палемдаш кӱлеш. Нунын деч посна ялыште ик мероприятият ок эрте. Пайрем йӱлашкак пурышо кандыра дене мучашлалтын. – Тыгай мӱндыр яллаште марий калыкын йӱлажым илышыш шыҥдарен толмаш моткоч куандара, – каласыш «Эрвел марий» МНКА МОО-н вуйлатышыже Инна Ивановна Тимиряева. – Ме марий калык культурын эн кӱлешанжым арален кодышаш, шке йӱланам, йылмынам пагалышаш да йӧратышаш улына. Васоламыт, мыйын шонымаште, чын корнышто улыт. О. Айгильдина.