Район администраций вуйлатыше Юрий Садыров самырык шуко икшыван еш-влаклан социаль тӱлам налме нерген свидетельствым кучыктен.

19 мартыште район администраций вуйлатыше Юрий Садыров самырык шуко икшыван еш-влаклан илыме верым налаш але посна пӧртым чоҥаш социаль тӱлам налме нерген свидетельствым кучыктен.

Ты гана окса сертификатым 3 самырык еш налын. Александрова Оксана Витальевна ден Зайцев Василий Сергеевичын ешышт Акиней ялыште илат. Еш оза пилорамыште пашам ышта, а ватыже ныл эргым воспитатла, нуно эше школыш огыт кошт.

Владимир Анатольевич ден Надежда Олеговна Прокопенкомыт ешыште кум ӱдыр кушкеш. Ешын озаже Подмосковьеште вахте йӧн дене пашам ышташ коштеш. Ӱдыр-влак Калтаса селаште йочасадыш коштыт.

Юрий Владимирович ден Олеся Георгиевна Гайнетдиновмыт еш Амчемучаш ялыште ила. Келшен илыше ешыште кок эрге да ӱдыр кушкыт. Юрий Нефтекамск олаште «Экосон» фирмыште пашам ышта.

Чаманен каласаш логалеш, еш оза-влаклан пашаверым кычалаш район, республике деч ӧрдыжкӧ каяш перна. Нунын ешышт сай да улан илышт манын, шкешт деч шогышыжым чылажымат ыштат тыршат. Мутланымаште нунын кокла гыч иктыже тыге каласыш – нуно шке пелашыштым ӱшанле улмыштым ужыт. Сандене нунын ешыштат келшен ила. А шуко икшыван ешлаште кеч-кунамат поро кумылан, икманаш, сай еҥ-влак кушкыт. Сандене нунылан кугыжанышат полшаш тырша, пӧртым налаш але чоҥаш окса сертификатым пуа. Субсидийын кугытшо – 900 утла тӱжем теҥге.

– Тек тендан пӧртыштыда волгыдо да шокшо лиеш да йоча-влакын юарлыме йӱкышт шоктыжо, – каласен самырык еш-влаклан свидетельствым кучыктышыжла Ю.М. Садыров.

В. Акиев.