Мемнан календарьна

Вӱдшор жап. Ончычсо тылзыште шулаш тӱҥалше лум вўд шканже корным почын, ынде мӱгырен-шортын, коремлашке йоген вола, шурно пасулам шер теммешке йӱкта, олыклам мушкеш.

Изи йогын-влак кугурак йолташышт дек ушнат, нунышт вес кугурак акаштым кычал каят... Поснак кас велеш эҥер-влак чот йӱкланат. Тиде йӱкыштє путырак сылне сем йоҥга да тудо шӱмым вӱчка.

Йӱдым икмыняр кылмыкта. Тунамже эҥер-влакын мурымышт шыплана. Эрдене ошкылмо годым, йол йымалне шотр-р шоктен, ий кандар-влак шаланат.

Ончыч вӱд эҥерла ден ер тӱрлаш темеш, сер деч ийым ойыра да вӱд ӱмбак нєлталеш. Ийже печкалтын каткалалтеш. Минут еда ешаралт шогышо вӱд дене ий шултышышт икте-весыштым шӱкедылын пудыртыл каят... Ончет, эҥер ден ер-влак ий деч эрнен, ташлен йогат.

Пайдале кайыквусо гыч, кугылудо-влак почеш, чыла тӱрлӧ моло лудо, курмызак толын шуыт. Лукын кашталалтын але вӱраҥ керем гай шуйнен, вуй ӱмбач кайыккомбо, турня, йӱксӧ-влак йӱкланен эртен-эртен каят.

Телымсе тымык ял-влак тӱрыс помыжалтыныт. Уремлаште кечыгут йӱк-йӱан шергылтеш. Пакчаласе да оралте йырысе пушеҥге вуйлаштат тымык огыл: телым илен лекше кайык-влакыштат, пашам ыштыме кокла гычак муралтен колташат жапым муыт. Вет кайык-влак тиде жапыште тошто пыжашыштым тєрлат, угыч ыштат. Вараже нуно, муным мунчен, игым пӱктен лукташ шинчыт.

А лум вӱд дене мушкылт вочшо да топланен шушо верлашке вольык кӱтӱ лектеш. Кече утыр ырыкта, телын пытартыш поянлыкшым – шыгыр чодыра йымалан да ӱмылан келге коремлаш шылын кодшо лумым кычал муын, румбыкан вӱдыш савыра.

Чодыра поснак сылне йӱк-йӱанлан поян. Тыште кажне чонанже шке семжым йоҥгалтара. Нунын кокла гыч кудыжо сєралынрак мура – ойыркален мошташат огеш лий. Чыла тиде сем, иктыш ушнен, эн чапле концертыш савырна.

Лышташан пушеҥге-влакышт эше чара улыт. Парчалашышт кержалтше кичкышт сылне кеҥеж вургемым чияш ямдылалт шогымыштым раш палдарат.

Икманаш, шортын толшо апрель тылзе эркын-эркын мурен эртен кая.