Башкирийыште ветеран-влак Сеҥымаш вашеш региональ тӱлам налыт

Башкирийын вуйлатышыже Радий Хабиров «О единовременной выплате отдельным категориям граждан, проживающих в Республике Бакшортостан, в связи с 75-летием Победы в Великой Отечественной войне 1941-1945 годов» пунчалым подписатлен. Тыште Кугу Отечественный сарын участникше да инвалидше, тылыште тыршыше, Кугу Отечественный сарыште колышо участникын ешыжын членже-влак нерген ойлалтеш.

Единовременный тӱлам республике бюджет гыч Кугу Отечественный сарын участникше ден инвалидше, концлагерьлаште, геттошто лийше ийготыш шудымо икшыве-влаклан тӱлаш тӱҥалыт, тудын кугытшо – 25 тӱжем теҥге; Кугу Отечественный сарыште колышо участник-влакын (инвалид) ешыштын членже-влаклан, Кугу Отечественный сар жапыште куд тылзе утла паша стажан улшо еҥ-влаклан – 5 тӱжем теҥге. Тиде категорий граждан-влак единовременный окса тӱлам 2020 ий апрель-майыште налыт.

Россий президентын пунчалже дене келшышын, Кугу Отечественный сарын ветеранже да тылыште тыршыше еҥ-влак Кугу Сеҥымашлан 75 ий темме вашеш федераль бюджет гыч 75 да 50 тӱжем теҥге дене оксам налыт.

Нине тӱла-влакым – 75 ден 50 тӱжем теҥгем – Российысе Пенсий фондын данныйже-влак почеш тӱлаш тӱҥалыт. Республикысе калыкым социально поддержатлыме рӱдер нимогай йодмашым возымо деч посна ветеран-влаклан региональ тӱлам – 25 ден 5 тӱжем теҥгем тӱлаш тӱҥалеш.

«Башинформ» ИА.