Ме йоҥылыш лийшаш огынал

Тыге ойлат Калтаса рӱдӧ эмлымверын лаборанткыже-влак Зульфия Фахразиева ден Джемма Закирова

Кажне еҥ таза да пиалан лияш шона. Нигӧ черланаш ок йӧрате. Нигӧ. Сандене шке тазалыкше верч кажне еҥ шке ойгыртышаш улеш. Поснак кызыт, кунам тӱняште лӱдыкшӧ коронавирус озалана. Тыште мыланна качественный диагностика полшен кертеш. Жапыште сдаватлыме анализ шуко лӱдыкшӧ черым кораҥден кертеш.

Калтаса рӱдӧ эмлымверын специалистше-влакын тӱҥ задачышт – чер-влакым ончылгоч пален налаш. Но туге гынат, эн кӱкшӧ квалификациян врачланат чын диагнозым шындаш да черле еҥым эмлаш тӱҥалаш неле. Тыште, конешне, тӱҥ рольым лабораторийысе шымлымаш-влак модыт. Анализ-влакын результатшым веле ончен, врач эмлаш тӱҥал кертеш.

Мемнан тачысе геройна-влак – Зульфия Киньягалеевна Фахразиева ден Джемма Каримовна Закирова. Лач нуно чыла еҥым шке чытымашышт дене сорлыклат. Нуно кугу опытан пашаеҥ улыт, но тыгодым ласка, виш да ушан, шке пашаштлан вуйын шогышо. Нунын деке кугыеҥ-влак гына огыл, тыгак изи йоча-шамычат толыт.

8.30 эр гыч нунын омсашт воктене калык погынаш тӱҥалеш. Тыге кечывалкочкыш марте. Кажне кечын 70-80 еҥ. Икманаш, нагрузко нунын кугу. Пашаштат моткоч кӱлешан да вуйын шогыман.

– Тыште пӱсӧ да чын лияш кӱлеш, – ойла Зульфия Фахразиевна. – Мыланна йоҥылыш лияш ок лий. Кызытсе жаплан келшен толшо оборудований дене пашам ыштена гынат, айдеме фактор кугу рольым модеш.

Лаборантын тӱҥ чертаже – чын лиймаш да тӱткылык. Нунылан чыла шотыштат тӱткӧ лияш кӱлеш. Эн тӱҥжым ужде кодаш огыл. Нине ӱдырамаш-влакын профессиональ пашашт 1986 ийыште тӱҥалын. Самырык ӱдыр-влак медучилище деч вара вигак Калтаса эмлымверыш пашашке толыныт. Зульфия Бирск медучилище деч вара, Джемма – Уфасе 1 №-ан медучилище деч вара. Зульфия мемнан районыштак шочын, а Джемма мемнан деке направлений почеш толын. Тудо шкеже Балтач районышто шочын-кушкын. Теве ынде 33 ий нуно медицине аланыште тыршат.

– Удыр-влак декретыш кайышт, – шарналтен ойлат нуно. – Коктын тӱҥалынна, нигӧ туныктен огыл мемнам. Чыла конспект, серкалымаш-влак почеш ыштенна.

Кызыт мемнан геройна-влакын лабораторийыштышт Австрий, Германий гыч кондымо анализатор-влак шогат. Тунам, кунам нуно пашам тӱҥалыныт гынат, вӱрымат, шондымат микроскоп гоч шымленыт, формула почеш шотленыт да тыгодым нуно йоҥылыш лийшаш лийын огытыл.

– Шым шагат эрдене толынна, лу шагат кастене мӧҥгӧ каенна, – шарнен ойла самырык жапшым Джемма Каримовна. – Неле лийын, конешне, но ме самырык лийынна, чыла пашам жапыштыже шуктенна.

Тунам нуно пашаверыштак иленыт манаш лиеш. Тиддеч вара кумло ий утла эртен. Илышат да паша условият вашталтыныт. ӱдыр-влак ешым чумыреныт, икшыве-шамыч шочыныт. Зульфия Каримовнан ныл ӱдыржӧ кокла гыч, кокытшо аважын кышаже дене каеныт. «Шке пашадам йӧратеда мо?» манын йодмылан нуно вигак да хор дене «Моткоч чот» манын вашештышт.

Лаборантын пашаже – тиде нунын илышышт, нунын келшымашыт. Кажныже пашашке ошкылшыжла тыгай оҥай паша да тыгай йолташ ӱдыр улмылан Юмылан таушта. Вет кажне пробирке, кажне анализ – тиде айдемын илышыже. Шоналташ гын, Зульфия Фахразиева ден Джемма Закирован пашашт деч посна мемнан поликлинике илен ок керт. Вет нунын вашмутышт деч посна врач-влак чын диагнозым шынден огыт керт. 70-80 процент диагнозым лач лабораторий шында. Зульфия Киньягалеевна ден Джемма Каримовнат айдемын илышыжым аралаен кодымашке кугу надырым пыштат.

О. Айгильдина.