Район библиотекын лудмо залыштыже Алевтина Баязитован у почеламут сборникшын презентацийже эртен

Илышыш поэзий дене чап кылдалтын. Тудо мыланна порырак, чулым да ласкарак лияш полша. Тӱнямбал поэзий кече вашеш район библиотекын лудмо залыштыже палыме поэтесса Алевтина Баязитован у почеламут сборникшын презентацийже эртен. Вашлиймашке «Муза» клубын членже-влакым ӱжмӧ лийын.

Тиде кечын тышке погынышо-влак колышташ да ончаш гына толын огытыл, тыгак нуно Алевтина Баязитован поэзийже гыч йӧратыме корно-влакым лудыныт. Поэтессым районысо «Эрвел марий» МНКА МОО-н вуйлатышыже И.И. Тимиряева шокшын саламлен.

Видео-презентаций гыч ужаш лийын, Алевтина Баязитова Марий Элысе ятыр палыме еҥ дене кылым куча, шукышт мемнан районнан шочшыжо улыт. Тудо шке почеламутшо-влакым лудын, нунышт тудын кӧргӧ шижмашыжым, кумылжым сайын почын пуат.

Вашлиймашым шке сылне мурышт дене, мутшо Алевтина Баязитован, Лилия Матвеева ден Раиса Кубатуллина сӧрастареныт. ӱжмӧ поэт-влак Радик Шайнуров, Николай Пряхин да Зинаида Глухова шкеныштын Кугу Сеҥымашлан 75 ий темме лӱмеш у почеламутыштым лудыныт. Тиде вашлиймаш кажнын чоныштыжо кужу жаплан шарнымашеш кодеш манын, ӱшаныме шуэш.

И. Васиева.