Карантиным текшырыдымылан мутым кучаш тӱҥалыт

Кузе Рафаэль Марданшин палемден: «Коронавирус эпидемий шарлымылан кӧра, Россий территорийыште санитар правилым да гигиенический нормативым пудыртымылан кӧра торжан мутым кучаш тӱҥалыт. Тышкак палемдыме самоизоляций правилым пудыртымашат пура. Ты пудыртымашлан граждан-влаклан 1 тӱжем гыч 30 тӱжем теҥге марте штраф пышталтеш. Угыч эше ты правилымак пудырта але айдемын тазалыкшылан эҥгекым ышта гын – 15 гыч 50 тӱжем теҥге марте штраф.

Юридический еҥ да посна предприниматель-влаклан штраф-влак кугырак лийыт – 1 млн. теҥге да 90 кече марте пашаштым чарен кертыт.

Россий Федераций субъект-влак, тидын годым мемнан республикынат, ешартыш чарымаш ден шыгыремдымашым пуртен, санитарно-эпидемиологический нормым, самоизоляцийым пудыртымылан административно мутым кучаш палемден кертыт.

РФ УК-ын «Нарушение санитарно-эпидемиологических правил» 236-шо статья уло. Правил-влакым пудыртымылан кӧра иктаж еҥ кола гын, 5 ий марте эрык деч посна коден кертыт, а кок да утларак еҥ кола гын, 7 ий марте.

«Тыгай мера-влак эн ончыч граждан-влакын тазалыкыштым аралаш да черланымаш ынже шаркалалт манын ышталтыт. Сатинарно-эпидемиологический нормым, угыч пуртымо йодмашым да шыгыремдымашым текшыраш ӱшына. Тиде тендам, лишыл еҥда-влакын арален кодаш полша», – палемден Рафаэль Марданшин.