Тунемше-влак нылымше тунемме четвертьым дистанционно тунеммаш гыч тӱҥалыныт

6 апрель гыч районысо школлаште тунеммаш дистанционный формыш куснен. Ты тунемме процесс кузерак мия, 2 №-ан Калтаса кыдалаш школын директоржо Ришат Хадыевич Бигаев каласкалыш.

– Мемнан школышто 1 гыч 11 класс марте тунемше-влак дистанционно тунемыт. Ме республике образований министерствын чыла йодмашыж ден темлымашыжым шуктена. Цифр-влак гыч тӱҥалам. Тачысе кечылан школышто 355 тунемше шинчымашым пога, нунын кокла гыч 201-ын мӧҥгыштыжӧ интернет деке ушымо компьютер але наутбукышт уло, 103-ын мобиль интернет дене смартфон, 31-же – интерент деч посна компьютер але ноутбук, 10 тунемшылан дистанционно тунемаш условий уке. Кызытеш школ расписаний кок арнялан, 20 апрель марте, ышталтын.

Ныл формо почеш тунеммаш организоватлалтын. Икымше, тиде дежурный класс, тӱҥалтыш класслаште тунемше-влаклан, тыге мемнан дене 3-шо класс тунемаш. Кокымшо формо – тиде онлайн-урок-влак: туныктышо-влак скайп, моло связь средства-влак дене пайдаланен тунемше-влак дене урок-влакым эртарат. Ик кечылан тыгай 2-3 урокым гына эртарыман, вет икшыве-влак гаджет-влакын экранышт ончылно кужу жап шинчышаш огытыл. Тунеммашын кумшо вариантше – электронный кейс-технологий: тунемше-влакын электронный почтышкышт заданий-влак колталтыт, нуным тунемше-влак ыштышаш да вашмутым туныктышылан колтышаш улыт. Пытартыш формо – кагаз кейс-технологий – тунемше-влаклан кагазыште возымо заданий-влак. Тиде тунемше-влаклан, кӧн онлайн режим почеш тунеммашлан условийже, гаджет, интернетше уке. Дежурный туныктышо-влакым палемдыме, нуно тунемме заданий-влакым тунемше-влаклан шалатен лектыт. Ты заданий-влак шочмын, вӱргечын да шуматкечын намиен кодат. Шочмын тунемше-влак заданийым налын, а вӱргечын да шуматкечын у заданий-влакым налме годым, туныктышылан шуктымыжым пӧртылтышаш улеш.

– Ришат Хадыевич, школ – тиде туныктымаш веле огыл, тыгак эше воспитаний.

– Воспитатлыме пашат намиялтын да намиялтеш. Арнялан ик гана класс вуйлатыше план почеш онлайн класс шагат-влакым эртара. Тыгак онлайн-экскурсий да онлайн-конкурс-влакат лийыт.

Чынжым каласымаште, тиде туныктышо, тунемше да ача-ава-влаклан чыла у, тидын шотышто нелылыкшат лектеш. Компьютер технике пудырген кертеш, интернетыш пураш ок лий. Лӱдын шогаш ок кӱл, тыныслыкым аралыман. Туныктышо онлайн-урокым эртарен ок керт гын, кӱлшӧ заданий-влакым элетронно колта. А варажым ме угыч туныктымо пашаш пӧртылына, а таче налме усталык ончыкыжым кӱлеш лиеш.